【慢過球證】「契仔」根度斯散步回防揹鑊,鐵定離隊的藍斯卻拼命追趕

睇足365 於 08/03/2019 發表 收藏文章
周四深夜進行歐霸十六強首回合 (香港時間),阿仙奴作客法甲球隊雷恩,阿仙奴以1-3不敵主隊,喺超過半場時間少踢一人之下,輸波並非難以接受,不過阿仙奴喺比賽末段被雷恩一次反擊攻勢攻入第3球,由1-2變成1-3,令次回合反勝難度大大提高,而其實呢個失波,根度斯嘅防守意識同態度都令人極度失望。


今仗開賽僅3分鐘,阿仙奴已經憑伊禾比嘅入球領先,其後雷恩嘅壓迫得當,開始憑前場球員速度威脅阿仙奴防線,阿仙奴其後亦再有一次機會入波,奧巴美揚接應直線獲得單刀機會,旁證舉旗示意越位,但慢鏡顯示應為誤判。


未能提早「殺死比賽」,阿仙奴形勢急轉直下,賓艾化及伊斯美拿沙亞等人多次進襲,阿仙奴防線已顯得狼狽,最終柏柏斯達夫普路斯41分鐘就兩黃一紅被逐,而且賠了夫人又折兵,同一個罰球攻勢中被對手炮彈式補射破網。此後十人應戰嘅阿仙奴就進入捱打局面,更喺65分鐘不幸擺烏龍輸到1-2。

雖說不幸,其實呢個入球,根度斯已經要負上責任,皮球慢溜向底線時,佢冇第一時間去追,反而原地舉手,到對手已經追到個波,佢「第三時間」先上前防守,而且「離行離迾」,俾對手輕鬆出波,最終導致蒙維爾擺烏龍,成為代罪羔羊。


第三個入波,根度斯嘅表現更係令人髮指。當時係比賽87分鐘,只要阿仙奴保持比數到完場,有一個作客入球在手,次回合主場出擊,其實出線機會仍大,點知被對手一個反擊攻勢,頭槌衝頂破網,令全場屢救險球嘅施治十分失望。

https://i.imgur.com/a5dc1r6.gif

仔細一睇,喺防守左路入楔嘅入球球員伊斯美拿沙亞,完全無人看管,最靠近嘅根度斯竟然散步回防,完全冇意圖去追伊斯美拿沙亞,甚至去到禁區附近就有收步跡象,反而已經鐵定離隊嘅前輩艾朗藍斯拼命追趕,可惜仍然太遲。亦可以睇到,失波之後,藍斯轉身向表達不滿。事實上,如果留意根度斯同球證之間嘅距離,會發現球證跑得仲快過根度斯。


當然,對於一位上季只係效力羅連安特嘅小將嚟講,根度斯今季綜合表現已經令人欣喜,而今場波第三個失波,即使佢有盡力追到底,亦未必唔會發生,而且主帥艾馬利今仗嘅應對及換人安排亦需要負上最大責任。一場失利,責任好難歸咎於一兩位球員,事實上今場踢得差嘅亦唔止根度斯一個,不過踢得差還踢得差,根度斯喺最後一球明顯俾人感覺未有竭盡所能防守,不可原諒,難免成為「箭靶」。相信剛加盟時落力跑動嘅根度斯,球迷仍然係喜愛嘅,希望佢之後可以吸收教訓,唔好恃寵生驕,學師兄藍斯咁為球隊奉獻一切。

全場精華

https://streamable.com/uhvtw

留言


請按此登錄後留言。未成為會員? 立即註冊
  • vty11 於 08/03/2019 評論 NO. 1

    真係好差

快捷鍵:←
快捷鍵:→