【德國名單】棄用三老將後2014冠軍陣容剩三人 路維徵召三新丁出戰歐國外

睇足365 於 15/03/2019 發表 收藏文章
2014世界盃冠軍德國,近年戰績差勁,2018世界盃分組賽出局,新設立嘅歐洲國家聯賽更由A聯賽降班,縱使大部分球迷都深信德國隊必須盡快完成世代更替,但主帥路維早前公開點名永不再選召侯姆斯、謝路美保定及湯馬士梅拿三名功臣,令三人喺國家隊「被退役」嘅做法就值得商榷。爭議過後,以下不如睇睇路維喺今個月會用咩陣容出戰國際賽。


德國隊主帥路維於2006年上任以嚟大受好評,2014世界盃封王更令佢地位更上一層樓,不過德國隊其後戰績逐步下滑,2018世界盃分組賽出局已令路維由天堂走向地獄,唔少球迷要求佢下台。喺2018-19歐洲國家聯賽中,德國竟然喺四戰全部不勝,下屆要降班出戰B聯賽。要爭取2020歐國盃決賽周席位,德國誓必要喺歐國盃外圍賽C組殺出重圍。

估唔到公布3月底國際賽名單之前,路維竟然事先張揚,指國家隊需要改變,唔會再選入侯姆斯、謝路美保定及湯馬士梅拿三位拜仁慕尼黑球員。前句「國家隊需要改變」所有球迷都會認同,後句「唔再選入侯姆斯、謝路美保定及湯馬士梅拿」亦可能會得到不少球迷認同,但以呢個方式去講出口,顯然係公關災難,因為從三人反應可見,球員本身並不知情,卻從傳媒得知自己已「被退役」。其實好多國家隊主帥面對呢個情況,都會選擇私下同球員傾談,勸球員自己宣布退出國家隊,再辦一場告別賽之類嘅做法好好睇睇,路維卻寧願成為「真小人」。


覆水難收,舊嘅唔去新嘅唔嚟,係時候睇下新名單有咩新氣象。路維今日公布三月國際賽名單,選入三位從未代表成年國家隊嘅新丁,分別係RB萊比錫後衛高路斯達文 (Lukas Klostermann)、哈化柏林中場歷卡斯史達克 (Niklas Stark) 及雲達不來梅中場祖漢斯艾格史甸 (Maximilian Eggestein)。

▲高路斯達文 (Lukas Klostermann)
22歲/RB萊比錫/右後衛
(曾代表2016德國奧運隊)

▲歷卡斯史達克 (Niklas Stark)
23歲/哈化柏林/防守中場、中堅

▲祖漢斯艾格史甸 (Maximilian Eggestein)
22歲/雲達不來梅/中場

▲2014世界盃冠軍陣容中,只剩隊長紐亞、卻奧斯及馬菲亞斯真達三人今期名單 (達斯拿今次因傷未能入選)。

三月國際賽期,德國隊將要出戰2020歐國盃外圍賽C組賽事,由於該組有5支球隊,德國首日賽事將會輪空,其後於3月24日作客荷蘭。德國同組對手有荷蘭、北愛爾蘭、愛沙尼亞及白羅斯 (Belarus 前譯白俄羅斯,該國官方聲明要求更改中文譯名為白羅斯),爭奪小組首兩名出線資格。

完整名單

門將
紐亞 (Manuel Neuer;拜仁慕尼黑)、達史特根 (Marc-André ter Stegen;巴塞隆拿)、奇雲查普 (Kevin Trapp;法蘭克福)

後衛
馬菲亞斯真達 (Matthias Ginter;慕遜加柏)、侯斯頓保 (Marcel Halstenberg;RB萊比錫) 、魯迪加 (Antonio Rüdiger;車路士) 、尼高舒侯斯 (Nico Schulz;賀芬咸) 、歷卡斯蘇尼 (Niklas Süle;拜仁慕尼黑) 、泰路基拿 (Thilo Kehrer;巴黎聖日耳門) 、高路斯達文 (Lukas Klostermann;RB萊比錫) 、歷卡斯史達克 (Niklas Stark;哈化柏林) 、莊拿芬達 (Jonathan Tah;利華古遜)

中前場
祖利安白蘭特 (Julian Brandt;利華古遜)、基拿比 (Serge Gnabry;拜仁慕尼黑) 、哥列斯卡 (Leon Goretzka;拜仁慕尼黑) 、根度簡 (İlkay Gündoğan;曼城) 、夏維斯 (Kai Havertz;利華古遜) 、甘美治 (Joshua Kimmich;拜仁慕尼黑) 、卻奧斯 (Toni Kroos;皇家馬德里) 、萊斯 (Marco Reus;多蒙特) 、利萊辛尼 (Leroy Sané;曼城) 、迪姆華拿 (Timo Werner;RB萊比錫)

*中文譯名以馬會球員名單為主

Source: GoalDFB

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • kklottery
    kklottery 於 16/03/2019 評論 NO. 1

    根本岸9,如果哥3條友爭氣下年打到曉飛,你唔選佢下年歐國盃打唔好又係攞黎俾人屌

快捷鍵:←
快捷鍵:→