巴塞丹比利死性不改,今次操練遲足兩粒鐘

睇足365 於 10/12/2018 發表 收藏文章
巴塞隆拿翼鋒丹比利 (Ousmane Dembele) 最近可以話係麻煩多多,佢早前已經因為擅自缺席操練,受盡批評,兼被主帥華維迪「雪藏」一場,最近以為佢已經有改善,但竟然喺操練中遲大到,隨時令佢喺巴塞嘅前途蒙上陰影。


丹比利 (或奧士文尼迪比利) 上季據報以高達1.15億歐元轉會費由多蒙特來投,背負著驚人身價,自然令人對佢抱有一定期望。可惜呢位年輕翼鋒喺加盟之初未能迅速適應之餘,更早早因傷長唞,缺席大半季賽事。不過傷癒之後,丹比利慢慢得到上陣機會,及漸漸適應,今季已經成為球隊主力,聯賽上陣14場,貢獻6入球、3助攻。


整體而言,丹比利嘅表現係令巴塞球迷滿意嘅,佢更加得到巴塞靈魂人物美斯嘅稱讚,美斯早前接受訪問時毫不吝嗇咁話覺得丹比利踢得好好,巴塞需要佢。滿意還滿意,但丹比利究竟對唔對得住超過1億歐元嘅物價呢?雖然身價虛高加上考慮到佢年僅21歲,潛力有目共睹,呢1億歐元有機會係值得嘅,但佢究竟可唔可以成長到預期嘅級數呢?俗語有云:「心態決定境界」丹比利嘅成長障礙好可能嚟自佢嘅心態。

最近,佢喺經歷缺操事件之後,被華維迪輕罰「雪藏」一場,又得到一啲隊中大佬力撐相信佢會有改善,同時要求佢向隊中前輩學習,大約相隔一個月,佢近日又惹麻煩,根據《馬卡報》及《每日體育報》報導,丹比利喺西班牙時間星期日嘅球隊操練中,遲到 2小時。

巴塞啱啱喺打吡戰中大勝愛斯賓奴4-0,丹比利喺比賽中射入一球,但喺比賽第二日早上11點開始嘅操練,丹比利居然去到接近下午1點先抵達訓練場地,結果佢要單獨進行訓練「補數」。事實上,今次操練係喺周中對熱刺前嘅兩次操練之一,喺呢個關頭遲大到,有可能令佢被剔出呢場比賽名單。報導指,丹比利到達後喺更衣室向隊友道歉並解釋原因係「瞓過龍」。


球員係一個極講求紀律嘅職業,遲到可以反映球員作息安排同紀律嘅不足,對於年輕球員嚟講呢少少分野隨時影響到佢將來嘅發展。

Source: MarcaMundoDeportivo

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→