巴利將打破傑斯英超上陣紀錄,兩人長青秘訣一樣:「以為大媽先咁做」

睇足365 於 22/09/2017 發表 收藏文章

雖然個名有啲似,但呢個加利夫巴利係西布朗老將 Gareth Barry,而唔係皇馬翼鋒 Gareth Bale。36歲嘅巴利唔係好似傑斯咁踼傳統豪門,但喺「長青」呢方面,佢都絕對稱得上一個傳奇,而佢即將喺今周嘅英超比賽,打破傑斯嘅英超上陣紀錄,成為英超史上上陣最多嘅球員。

巴利同一般老將唔同,佢一直都仲係球隊嘅絕對主力,而且打嘅位置仲係極需要體力同跑動嘅防守中場。今季英超打咗5場,佢就已經正選咗4場,而且全部打足晒90分鐘,平均錄得1.3個攔截,傳球成功率77.3%。佢已經喺英超上陣632場,平咗曼聯名宿傑斯嘅紀錄,只要佢喺今個周末,阿仙奴對西布朗嘅比賽中上陣,就可以成為英超史上上陣最多嘅球員。


唔好聽講句,又老又慢嘅巴利,到底點解可以到咗呢個年紀,仍然穩佔英超球隊嘅防中主力位置?除咗用經驗同智慧彌補速度上嘅不足,原來佢嘅長青秘訣同傑斯一樣,就係做瑜伽!


佢最近接受訪問時,就向記者「懺悔」,話曾經都心諗「男人老狗做乜鬼瑜伽呀?」,佢話喺8年前,即係喺阿士東維拉嘅最後一季,有教練建議佢開始練瑜伽。

「當時我有一個老套嘅觀念,諗住呢啲嘢只係老女人先會做。」

「我唔想班隊友望住我,心諗『佢喺度做乜呀?』」

「不過我都決定試下,而且睇到佢嘅好處,雖然班隊友踩健身單車嗰陣會恥笑我。」

「有時一諗到朝早要起身做瑜伽,就覺得好慘,不過我練完之後,開始覺得身體狀況有改善……傑斯好早就開始做瑜伽,慢慢大家都見到成效。依家我返到更衣室,會見到有七、八人做緊。」

最後,佢表示自己仲會繼續踼,而且仲會繼續尋求新挑戰:「朗奴高文好想我留低,佢對於我離隊好不滿……喺愛華頓我會冇咁大壓力,不過我想尋求最後嘅挑戰。」佢仲話,因為傑斯喺英超時代之前已經為曼聯踢緊頂級聯賽,所以可能會以佢嘅672場上陣紀錄為目標。

Source: DailyMailWhoscored

留言


請按此登錄後留言。未成為會員? 立即註冊
    快捷鍵:←
    快捷鍵:→