對「細哨」花俏技術反感，馬基利尼爆料：「我話會踢到佢入醫院，你估下佢點反應？」

喺球迷圈子入面，近年有一個值得爭議嘅題目，就係到底球員例如係尼馬，使用彩虹過人 (rainbow flicks) 之類嘅花巧動作過人，係唔係有挑釁或唔尊重對手嘅意思呢？或者當對手見到呢個動作，而故意犯規，又係唔係公道嘅做法？呢個問題大家嘅取態都好兩極，其中一個有趣嘅講法就係有人質疑，點解朗拿甸奴做就係瀟灑，尼馬俾人踢就抵死。不過原來當時都有防守球員認為朗拿甸奴唔尊重。


前法國國腳馬基利尼 (Claude Makelele) 曾經被譽為世上最強防守中場，原來佢都對於「細哨」嘅盤扭感到困擾。喺2005至2007年之間，馬基利尼效力嘅車路士，曾經同「細哨」效力嘅巴塞隆拿喺歐洲賽場上踢過6場比賽，兩支風格迥異嘅球隊，自然踢出唔少火花。


馬基列尼最近接受《RMC》訪問，佢爆料表示當年曾經出言威嚇朗拿甸奴：

I would rather you come at me and dribble past me properly. But with all your PlayStation tricks, I’m going to put you in hospital!

如果用廣東話講大意就係：「你過人嗰陣唔好搞咁多嘢呀，如果你再好似打PlayStation咁花巧，我實踢到你入醫院！」

但馬基列尼話「細哨」嘅反應都幾出人意表：「你估下佢點反應？佢同我道歉，仲話希望我原諒佢。」


馬基列尼仲將國家隊隊友施丹同朗拿甸奴作出比較：「施丹係一個藝術家，佢每一個動作都係為咗有利於進攻或前進。對住佢，會令你無話可說。朗拿甸奴都係一樣，佢都令人無話可說，但有啲時候，佢係做多咗。」


其實，兩人並無心存芥蒂。當年呢個矛盾大對決的確係十分經典。
馬基利尼對巴塞精華
https://www.youtube.com/watch?v=qpnXjVJ4x_Y
朗拿甸奴車路士精華
https://youtu.be/oEG_X8Dy2dM
Source: Daily Mail、Marca