基沙文靚爆罰球破網紀錄僅次美斯 「重生」莫拉達跑半場單刀射破網

睇足365 於 14/04/2019 發表 收藏文章
今季西甲巴塞隆拿奪冠機會高唱入雲,西甲「二哥」馬德里體育會啱啱對切爾達一仗可能會少咗球迷留意,不過好波不妨一睇再睇,呢場比賽都有兩個精彩入球。


西甲第32輪,馬體會主場出擊面對切爾達,派出基沙文及安祖哥利亞正選攻堅,馬體會初段攻勢較多,但切酗達亦有保達保斯車身窩利勁射,被奧比歷擋出。戰至42分鐘,馬體會獲得娥眉月頂罰球機會,基沙文左腳一射破網,球速既快,又彎過人牆,喺門將手頂飛入,網都幾乎穿,靚到絕!


資料顯示,基沙文今季3次射入罰球,喺西甲僅次於射入6球嘅美斯,不過基沙文呢3個入球只需11次主射罰球就完成,而美斯入6球就用咗38次射門完成,反映基沙文嘅命中率亦十分高。



下半場,前車路士前鋒莫拉達喺62分鐘入替域度奴後備登場,佢隨即喺74分鐘,接應基沙文美妙直線,由中場線開始跑單刀,殺入禁區推過門將勁射破網,熟悉嘅莫拉達終於回歸!


莫拉達喺車路士時期表現為人詬病,佢今年加盟馬體會之後,雖然未至於大殺四方,但喺西甲上陣10場,就已經攻入5個入球、交出1個助攻,已經直接參與馬體會西甲40%入球,效率大有改善,對比喺車路士最後半季16場入5球,參與藍軍英超12%入球,可以話係重獲新生,起碼好似呢球跑單刀印象中已經好耐冇見。

結果馬體會呢場憑基沙文貢獻一個靚罰球、一個靚助攻,同莫拉達單刀入波,以2-0輕取切爾達,同一輪巴塞輪換和波,馬體會以9分落後。

全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→