囤積幼齒？《馬卡報》指皇馬已落實蘇拿利首簽，河床新星柏拉斯奧斯身價2,000萬歐元精選

由睇足365 於 15/11/2018 發表收藏文章

皇家馬德里近年一改「一年一星」方針，改為不斷收購有潛質嘅年輕球員，俗稱「妖人」或「幼齒」，加以培育。「銀河艦隊」即使今夏有當家球星C朗拿度轉投祖雲達斯，仍出乎意料地未有收購一位頂級攻擊球員作補充，除咗由車路士收購門將古圖斯及回購前鋒馬利安奴迪亞斯兩位25歲或以上球員之外，重鎊收購反而係6,100萬鎊引入法林明高18歲巴西翼鋒雲尼斯奧斯 (Vinícius Júnior) 。今季開局戰績欠佳解僱盧柏迪古後，皇馬似乎不改「囤積幼齒」嘅轉會方針，即將簽下20歲阿根廷中場艾斯基柏拉斯奧斯。

按此觀看圖片

根據西班牙傳媒《馬卡報》記者Jose Felix Diaz消息，皇馬已經傾妥蘇拿利任內第一筆引援，即將以2,000萬歐元由河床簽下阿根廷中場艾斯基柏拉斯奧斯 (Exequiel Palacios) 。記者Jose Felix Diaz指出，皇馬高層繼續秉乘近季網羅年輕球員嘅原則，向河床提出收購艾斯基柏拉斯奧斯，交易尚未100%完成，但雙方已經基本完成談判，柏拉斯奧斯將於一月以2,000萬歐元轉會費加盟，並簽約至2024年。

消息得到河床主席 Rodrigo D'Onofrio 證實，佢喺接受訪問時透露，河床現時正忙於征戰南美自由盃決賽，待完成次回合賽事後就會同皇馬繼續處理轉會事項。

現年20歲嘅柏拉斯奧斯，17歲時升上河床一隊，但直至上季季尾只上陣過19場聯賽，今季逐漸取得主力位置，上陣8場聯賽貢獻1入球2助攻，更喺南美自由盃上陣10場，扮演重要角色。呢位年輕中場腳下功夫優秀，擅長護球、變速突破、長傳，亦能於中場協助逼搶及攔截，佢今年9月起已經得到阿根廷大國腳徵召上陣2場，上期國家隊名單再次入選但因傷退隊，今個月就未有入選。
皇家馬德里自2015/16球季起收購21歲或以下球員如下：

15/16
高華錫 (21) 3,100萬歐元
華利祖 (18) 500萬歐元
阿辛斯奧 (19) 350萬歐元

17/18
費奧靴南迪斯 (19) 2,400萬歐元
施巴路斯 (20) 1,600萬歐元

18/19
雲尼斯奧斯 (18) 6,100萬歐元
盧連 (19) 850萬歐元

(資料來源: Transfermarkt)

河床將要喺下星期南美自由盃決賽次回合主場迎戰小保加，係呢對阿根廷首都死敵喺南美自由盃史上，第一次於決賽碰頭，呢場每每需要出動防暴警察嘅對碰，首回合喺小保加主場賽和2-2，次回合於香港時間11月25日清晨04:00上演。若河床贏得今屆南美自由盃，柏拉斯奧斯有機會喺今年12月舉行嘅2018 FIFA世界冠軍球會盃中與皇馬碰頭。

按此觀看圖片