唔係摩佬!皇馬宣布球王重新掌「艦」,施丹二次轉身吃回頭草

睇足365 於 12/03/2019 發表 收藏文章
西甲豪門皇家馬德里最近經歷前所未有嘅低谷,喺本土賽場國家打吡連敗,又喺歐聯被阿積士淘汰出局,結果終於狠下心腸換帥,人選並非摩連奴,而係施丹。


皇家馬德里官方宣布,正式委任施丹為主教練,簽約至2022年。皇馬發表聲明宣布施丹回巢消息同時,感謝原主帥蘇拿利今個球季執掌球隊期間對工作嘅投入及對球會嘅忠誠。報導指出,原為皇馬B隊主教練嘅蘇拿利,今次由一隊主帥位置退落嚟後,將會喺球會內部獲安排新崗位。


蘇拿利今季臨危受命,接替盧柏迪古領軍,至今各頂賽事32場中,錄得22勝2和8負;單論聯賽,17戰取得12勝1和4負,現時於西甲聯賽榜排第3位,落後榜首巴塞隆拿12分。作為「救火教頭」,不宜對蘇拿利要求過於苛刻,整體而言佢治下嘅皇馬戰績未至於唔合格。不過蘇拿利嘅惡夢由2月27日開始,連續兩場比賽,先喺西班牙國王盃次回合被巴塞隆拿炒三球,聯賽馬上再輸0-1,再於歐聯16強被牌面實力被睇低一線嘅阿積士大炒而輸1-4,除咗連輸兩場國家打吡之外,更慘嘅係呢三場比賽喺一個星期內發生而且全部都係主場,故皇馬會方狠下心腸亦可以理解。



人選方面,曾經傳出皇馬會請摩連奴回巢,或者等待熱刺領隊普捷天奴。上季先帶領皇馬取得歐聯嘅施丹雖然都係傳聞人選之一,不過半季前先「華麗轉身」「急流勇退」嘅法國球王,咁快就重返崗位,個人嚟講都係有少少跌眼鏡,估計喺經歷近兩任主帥嘅失敗後,眾望所歸吃回頭草嘅施丹,喺隊內嘅話事權將會進一步提升。

Source: Guardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • SuperChelsea
    SuperChelsea 於 12/03/2019 評論 NO. 1

    歐洲足協真係黑

快捷鍵:←
快捷鍵:→