哥迪奧拿都睇錯人:「我以為大衛施華踢英超衰梗!」

睇足365 於 24/08/2019 發表 收藏文章
好多人對於英超嘅印象,都係極度體力化、節奏快速、球員身型特別重要,因此有部分球員登陸英超時,球迷已經「睇死」佢將會失敗收場,但凡事總有例外。

loading

曼城中場大衛施華身高1.7米,而且體型十分單薄,驟眼睇俾人弱不禁風嘅感覺,正正符合刻版印象中難以喺英超取得成功嘅球員典型。轉眼間,大衛施華自2010年由華倫西亞加盟曼城,已經第9個球季,33歲嘅佢喺季前已宣布今季完約後會以自由身離隊,但以佢效力多年表現,毫無疑問將來退役後會被成為曼城名宿。佢成功以過人嘅足球智慧、靈巧嘅走動及細膩嘅腳下功夫,彌補對抗性不足,成為當代一位公認極之出色嘅中場球員。

今個星期英超比賽,曼城作客般尼茅夫,只要大衛施華獲派上場,就會係佢第400次為曼城披甲,截至第399場,佢已為曼城射入71球、交出130個助攻,單計英超就上陣284場,射入54球、交出96個助攻,協助球隊奪得4屆英超冠軍、4次聯賽盃冠軍及2次足總盃冠軍。

曼城主帥哥迪奧拿透露,當年得知大衛施華加盟曼城時,仍任教巴塞隆拿嘅佢,曾認為呢位現任曼城隊長難以取得成功:「佢擅長喺窄小範圍內移動,係世上最好之一。不過佢係一個矮小嘅球員,身型單薄,亦唔係一個典型英超box-to-box型中場。以我當年喺外面嚟睇,我諗佢會踢得好辛苦,但係我好高興自己睇錯咗。

呢個係我嘅第一印象。結果佢不但有『一季貨仔』,而係10個球季都做得到,簡直係冇得頂。佢係一個好有鬥心嘅球員,如何面對逆境,正正係佢取得成功嘅關鍵,佢可以以此為傲。」

loading

事實上,另一位曼城「未來名宿」阿古路,亦係一位身材矮小但於英超取得成功嘅外來球員,能夠喺英超有呢個成就嘅阿根廷球員亦唔多。

loading


Source: BBC

留言


請按此登錄後留言。未成為會員? 立即註冊
    快捷鍵:←
    快捷鍵:→