又睇中「英超兵」!廣州恆大求購阿拿奧杜域,出走機會有何變數?

睇足365 於 19/01/2019 發表 收藏文章
低調過一段日子嘅中超市場,最近再次同知名球員拉上關係,先前已經有熱刺中場穆沙丹比利 (Moussa Dembele) 加盟廣州富力,中超球會嘅下一個目標係韋斯咸前鋒阿拿奧杜域 (Marko Arnautovic) 。


根據《Sky Sports》報導,相信上海上港約一星期前前曾經向英超韋斯咸提出以3,500萬鎊轉會費收購阿拿奧杜域。阿拿奧杜域兄長兼經理人開腔表示,登陸中超符合球員本人嘅意願,阿拿奧杜域100%專注於為韋斯咸比賽,亦明白球迷對佢嘅愛,但認為球員想轉換新環境挑戰冠軍係足球世界常態,希望球會可以放行。阿拿奧杜域兄長又指,球會當初以約2,000萬鎊將佢收購,如今獲得3,500萬鎊轉會費已接近一倍利潤,認為報價足夠優厚。

與此同時,韋斯咸官方表示阿拿奧杜域為非賣品。根據相關報導,上海上港嘅報價遭到「鎚仔幫」拒絕,令上海上港將目標轉向前韋斯咸中場、現馬賽中場皮耶 (Dimitri Payet) 。


《Sky Sports》最新消息,指出另一家中超球會廣州恆大正與韋斯咸相討阿拿奧杜域轉會事宜。另外,縱使早前曾公開表示阿拿奧杜域為非賣品,但韋斯咸嘅態度明顯軟化,認為阿拿奧杜域離隊並非不可接受。主帥柏歷堅尼就表示,自己希望阿拿奧杜域,但同球會之間並冇分歧,自己完全可以決定球員嘅去留,但佢會選擇對球員及球會雙方都最好嘅解決方法,如果佢認為放人對雙方都好,佢就會放人。佢亦表示球會的確唔希望放售阿拿奧杜域。

引用
"If I say the player must stay, the player will stay.

"I don't have any problem with the club. In all the months I've been working here I never had any problems with the owners about that.

"So they are not forcing me to sell Marko Arnautovic. But I think as a manager the best thing is to take the solution that is best for the player and the club, both together.

"If they agree, we don't have any problem to change.

"I am not telling the club about it. If it's a good deal for both parties we will arrange to be without Marko. But the club doesn't want to sell him."

事實上,雖然阿拿奧杜域兄長表明,阿拿奧杜域唔會以罷踢要脅離隊,亦會100%投入,但《BBC》指阿拿奧杜域肯定冇隨隊出發今晚作客般尼茅夫嘅英超賽事,原因自然令人聯想到同轉會談判有關,《Sky Sports》又認為阿拿奧杜域上輪英超被換出時嘅姿態疑似向主場球迷道別。綜合而上,可以整理如下:
  1. 球員已表明離隊意願 (透過兄長兼經理人)
  1. 球會本來絕對唔願意放售阿拿奧杜域,但近日態度軟化
  1. 主帥柏歷堅尼表示自己對轉會事務有決定權,雖然佢知道球會唔希望賣人,但若收到對球會及球員雙方有利嘅報價,佢會接受
  1. 阿拿奧杜域並唔會隨隊參加今輪聯賽,極大機會同轉會談判有關
單憑上述幾點可以推斷阿拿奧杜域今個轉會窗內離隊機會頗高,但最大變數係暫時未有關於廣州恆大報價金額嘅可靠報導,若球員與球會冇發生任何不愉快事件的話, 球會仍有可能要求不合理轉會費,令交易告吹,畢竟以超過4,000萬鎊 (上海上港3,500萬鎊報價被拒) 收購阿拿奧杜域呢個級數嘅球員,個人主觀認為並唔合理。29歲嘅阿拿奧杜域今季為韋斯咸上陣16場聯賽,射入7球、交出2次助攻,僅以1球次於首席射手菲臘比安達臣,對韋斯咸而言自然十分重要,因此可以話呢筆交易完全取決於柏歷堅尼對阿拿奧杜域定下嘅心理價位,筆者認為柏歷堅尼若接到4,000萬鎊報價,就應該放人。

Source: SkySportsBBCBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→