又一英格蘭後衛勢出國,丹尼路斯或投PSG

睇足365 於 19/07/2019 發表 收藏文章
英格蘭球員曾經被認為唔適合到其他歐洲大聯賽效力,一直以嚟較少外國大球會嘗試簽入當打年輕嘅英格蘭球員,不過最近馬德里體育會已正式由熱刺簽下查比亞,成為該球隊92年來首名英格蘭球員。最近,傳出同樣嚟自熱刺嘅丹尼路斯,亦有可能登陸其他聯賽。

根據《Sky Sports》報導,英格蘭左閘丹尼路斯吸引到多間海外球會嘅興趣,法甲豪門巴黎聖日耳門正於爭奪中領先。


報導指出,熱刺今個夏天展開亞洲之旅,前往新加坡進行季前熱身,但丹尼路斯並未被列入大軍名單中,佢已經唔再喺主帥普捷天奴嘅計劃之中。熱刺方面解釋,丹尼路斯缺席新加坡之旅嘅原因係為咗探聽潛在轉會可能。

除PSG外,德甲球隊史浩克04亦對29歲嘅丹尼路斯感到興趣。熱刺於2007年由列斯聯以100萬鎊簽入丹尼路斯,此次目標價位為2000萬鎊。《Sky Sports》指出,丹尼路斯仍希望留隊爭取正選位置,若收到十分吸引嘅個人條件,先會考慮離開北倫敦。

熱刺早前以2170萬鎊將右閘查比亞出售到馬體會,若再出售左閘丹尼路斯,左閘位置將只剩賓戴維斯一人。另外有報導指,熱刺希望簽下19歲嘅賴恩施斯隆 (Ryan Sessegnon) 作為補充。



現時PSG陣中左閘人選有4名,分別係26歲嘅古沙華 (Layvin Kurzawa)、同樣26歲嘅祖安賓納特 (Juan Bernat) ,以及年輕球員尼蘇基 (Stanley Nsoki) 及巴加 (Mitchel Bakker)。

Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→