卡卡點出兩個今屆金球獎心水,C朗美斯皆不在列

睇足365 於 24/08/2018 發表 收藏文章
金球獎 (Ballon d'Or) 作為足球界個人獎項最高榮譽之一,近年一直由C朗拿度及美斯爭奪,佢哋統治呢個獎項嘅時間,剛好係過去10年。由2008年開始至今10屆金球獎,兩人各自取得5次。「C朗美斯時代」正式展開之前嘅最後一位金球獎得主,正係2007年力壓二人嘅巴西中場卡卡。卡卡亦曾經戲稱:「我係最後一個拎到金球獎嘅地球人。」


10年過去,會否剛好迎來一個時代嘅終結,有可能。過去10年,C朗、美斯都係以近乎難以挑剔嘅表現稱霸,個人精彩表現有之、數據優勢有之、球會各項賽事取得好成績、國家隊表現優異,往往能夠同時滿足大部分條件。如今C朗已33歲、美斯已31歲,表現有所下滑實屬正常。


美斯今季雖然於球會成功帶領巴塞隆拿奪得西甲冠軍,但喺歐聯8強被羅馬反殺出局,阿根廷國家隊及其本人於世界盃決賽周表現令人失望,恐怕已難問鼎金球獎。


C朗帶領葡萄牙殺入世界盃16強,又有連中三元嘅演出,表現尚算中規中距、甚或已算力挽狂瀾;聯賽方面,下半季及時回勇,擺脫上半季嘅低迷,但聯賽只以第三名完成。當然,C朗最大籌碼係完成歐聯三連霸壯舉。不過,球壇上係咪冇更有說服力嘅人選?卡卡認為有。

身為前金球獎得主兼前皇馬球員嘅卡卡,提出兩個人選:摩迪、麥巴比。個人認為摩迪係一個極有說服力嘅人選,無疑佢場內場外低調嘅作風令人容易忽略咗佢,但其實佢絕對係當今中場大師之一,提到C朗歐聯三連霸,都唔可以忘記呢三連霸,摩迪同樣有莫大功勞,再者32歲嘅佢喺世界盃為克羅地亞奔走全場,一直帶領球隊殺入決賽,一個世界盃金球獎已經說明一切。如果克羅地亞奪冠,相信金球獎非摩迪莫屬,就算而家只得到亞軍,個人認為摩迪亦值得一個金球獎。


卡卡就話:「摩迪今年有令人深刻嘅成績,拎到歐聯、出戰世界盃決賽,佢係一個可以創造機會同統治球賽嘅人。」另外,卡卡又睇好世界盃冠軍成員嘅麥巴比:「麥巴比好強,而且前途無可限量。」

不過,論份量,初出茅廬嘅麥巴比,又點及「默默統治球賽」嘅摩迪呢?

Source: ASSportbible

留言


請按此登錄後留言。未成為會員? 立即註冊
    快捷鍵:←
    快捷鍵:→