「十大金童」堂安律踢洛賓母會，使出「洛賓的軌跡」

之前曾經喺《日本新10號身價達2000萬歐元被李城睇中，「十大金童」堂安律更吸引哥迪奧拿注目》一文中，約略介紹過揚威國際嘅日本新星堂安律 (Ritsu Dōan) ，最近又有南野拓實 (南野拓実 Takumi Minamino) 喺歐霸分組賽為薩爾斯堡紅牛大演帽子戲法，成為史上第一個喺歐霸上演帽子戲法嘅日本球員。堂安律最近又不甘示弱，喺荷甲比賽中施展「洛賓的軌跡」射入金球，事有湊巧，佢所屬球會正係洛賓嘅母會。


堂安律效力嘅格寧羅根 (FC Groningen) 喺最近一輪聯賽，主場迎戰海倫芬，由堂安律射入金球，以2:0擊敗對手。格寧羅根今仗先由左中場禾美頓 (Django Warmerdam) 頭槌27分鐘先開紀錄，去到38分鐘，司職右中場嘅堂安律，喺右路突破，拐入中路推大位左腳熨射，個波彎向左上角入網，有幾分「洛賓的軌跡」影子。另外，堂安律今仗對手海倫芬陣中都有一名日本球員上陣，就係26歲中場小林祐希 (Yuki Kobayashi) 。

https://i.imgur.com/pysanxz.gif
其實格寧羅根正正係洛賓嘅母會，呢位荷蘭一代傳奇翼鋒12歲已加入格寧羅根青訓，2000年以16歲之齡踏上職業賽場，兩季之間為格寧羅根上陣46場聯賽射入8球，隨後被荷甲更大球會PSV睇中收歸旗下，2004年轉投車路士之後嘅事，大家已經相當熟悉。格寧羅根雖然只屬荷甲中小型球會，但其實出產過唔少球星，只係佢哋成名之時，多數已轉投當地更大球會，或者海外球隊，例如巴塞前鋒蘇亞雷斯、利物浦後衛雲迪克、前曼聯後衛白蘭特等都係格寧羅根出品，就連現任荷蘭國家隊教頭朗奴高文都係出身於格寧羅根！


講返堂安律，呢位20歲中場喺2017年夏天由大阪飛腳外借到格寧羅根，今年夏天正式轉會，由上季至今各項賽事為格寧羅根貢獻13入球、5助攻，更憑出色表現入選2018高柏獎 (Trophée Kopa) 最後十強，呢個獎項與金球獎同樣由《法國足球》主辦，可以話係「U21版金球獎」。2018高柏獎最後十強有堂安律、麥巴比、普列錫、當拿隆馬、古度尼、阿歷山大阿諾、祖斯甸古華特等球壇新星。

全場精華
https://youtu.be/Si8AoDK06n4
堂安律「球王片」
https://www.youtube.com/watch?v=ug8-VJArHLA
Source: Transfermarkt、Fox