勿做報警L!警方呼籲韋斯咸球迷:「輸波唔好再打999」

睇足365 於 21/11/2017 發表 收藏文章
英超球隊韋斯咸近排真係唔多掂,回想起兩季之前,佢哋憑皮耶大爆發,以第7位完成2015-16英超球季,但之後搬完球場就有所回落,去到今季,佢哋竟然踼完12場聯賽只得9分,淨係贏過兩場波,十分離譜,暫時排喺聯賽榜第18位降班區位置。佢哋嘅領隊都由曾經口碑唔錯嘅比歷,換成「千古奇冤」莫耶斯,但換帥確實唔係萬靈丹,「椰子」第一場波就輸。冇耐之後,當地警方就出post話啲韋斯咸球迷一輸波就報警,叫佢哋千祈唔好咁做。


韋斯咸今季踢得真係好差,完全唔似近年可以穩佔中游兼挑戰上游嘅「英超羅賓漢」,佢哋喺最近國際賽期之前,11場英超錄得2勝3和6負,入11球失23球,攻不銳守不穩,導致領隊比歷被炒。佢哋決定換上英超經驗豐富嘅莫耶斯救亡,想當年莫耶斯的確幫助愛華頓更上一層樓,長年可以維持喺英超中游,可以用蔗渣價錢踼出燒鵝味道,只係後來去到曼聯接過費Sir退休後留低嘅燙手山芋,落得被嘲笑「足球天才」嘅下場。

「椰子」喺上周末迎來接手槌仔幫嘅第一場聯賽,佢帶隊作客屈福特,結果被對手嘅韋曉士同李察利臣各建一功,輸0-2而回。公道啲講,第一場領軍,就要帶住呢隊槌仔幫作客今季踢得好好嘅屈福特,絕對唔易踢,輸波都係意料中事啩。


不過槌仔幫班球迷就好嬲,佢哋喺球隊輸波之後竟然打999報警,不過唔知佢哋同報案中心講咩啦,唔知係咪叫佢哋去急救愛隊,定係要拘捕領隊、班主、球員呢?

咁已經夠搞笑,但都未算,相信係由於「報警L」人數眾多,搞到負責韋斯咸所在社區嘅Essex警方忍唔住,要喺Twitter出post。

loading


警方個post話:「因為韋斯咸又再輸波而你唔知點做好,所以就打999,呢個係完全唔可以接受嘅行為!咁樣完全係浪費我哋時間。」

《BBC》嘅球評Nick Godwin認為,韋斯咸球迷依家對於球隊成績好唔滿意,加上佢哋唔係好鍾意球隊嘅新球場,又唔係好鍾意莫耶斯做領隊,所以好嬲。佢又認為,球迷亂打999固然唔能夠接受,但佢哋喺比賽之後就打999,反映到佢哋究竟有幾無助。

最慘就係,好戲在後頭,韋斯咸嚟緊仲要對唔少強敵,特別係12月頭連撼曼城、車路士同阿仙奴,睇嚟有排輸,唔怪得警方要出post呼籲啦。

loading


Source: BBCSportbible

留言


請按此登錄後留言。未成為會員? 立即註冊
  • 返身戰 於 21/11/2017 評論 NO. 1

    降班很定無佢份,之前做过羅賓漢實有球隊還人情

  • 火爆火 於 21/11/2017 評論 NO. 2

    都唔知小豆累咗韋斯咸,還是韋斯咸累咗小豆???

快捷鍵:←
快捷鍵:→