創造力慘不忍睹 史高斯力勸母會:「曼聯應買奧斯爾!」

睇足365 於 25/10/2019 發表 收藏文章
今個星期歐霸賽事,曼聯作客塞爾維亞球隊柏迪遜,縱使順利取得三分,終止各項賽事連續5場作客不勝劣績,但表現完全冇說服力。呢場比賽中,曼聯僅憑馬斯亞於43分鐘射入12碼淨勝一球。而且雖然佔有60.2%控球率,但全場射門只錄得5射1中,反映球隊未能創造足夠進攻機會。事實上,曼聯自從8月11日以4-0大勝車路士後,於所有賽事從未攻入超過一球,進攻能力十分令人擔心。

loading

今仗於電視台擔任嘉賓評述嘅曼聯名宿史高斯就提出建議:

「奧斯爾係一個可以將球隊串聯嘅球員,佢嘅職業生涯已經證明佢嘅質素係一流,佢可能係一個短線解決方案。

呢個收購未必會實現,但我覺得佢係適合嘅球員,短期嚟講可以解決曼聯嘅問題。」

31歲嘅奧斯爾不受阿仙奴主帥艾馬利重用,今季更被投閒置散,最近5場比賽雖然冇傷冇病,但只有隨隊操練而未有進入比賽大名單,加上季初因曾於街頭遇襲而休戰,令佢至今只於各項賽事上陣2次。若曼聯有意收購奧斯爾的話,需要提防重蹈覆轍,因為奧斯爾同山齊士一樣係高薪一族,一向態度勤勉嘅山齊士尚且未能於曼聯交出表現,因而被球迷嘲諷為雲加嘅暗黑兵法;擁有「藝術家性格」嘅奧斯爾會否成為又一位高薪水貨?曼聯已經有一個普巴在陣,又可唔可以容納多一個極度需要戰術自由度嘅球員呢?相信呢啲都會成為曼聯需要考慮嘅事情。

Source: GoalEveningStandard

留言


請按此登錄後留言。未成為會員? 立即註冊
    快捷鍵:←
    快捷鍵:→