【「前」新乜乜】巴塞宣佈沙治森柏解約,傳自由身投神戶跟隨「小白」

睇足365 於 05/03/2019 發表 收藏文章
近年日本 J League 再次開始引入一啲「名牌」外援,不過俾人感覺都係主要向年過30嘅歐洲球星招手,估唔到 J League 有機會同一位年輕巴塞隆拿中場拉上關係。巴塞中場沙治森柏 (Sergi Samper),近日被盛傳將會登陸日本聯賽,目的地更係前輩恩尼斯達效力嘅神戶勝利船。


沙治森柏出身自巴塞隆拿拉瑪西亞青訓營,出道初期因為技術特點而被期望成為沙維或布斯基斯接班人,《ESPN》更指佢係新哥迪奧拿 (球員版) 。不過,現年24歲嘅森柏喺巴塞競爭激烈嘅中場入面,實在難以獲得足夠上陣機會去成長,過去曾經外借到格蘭納達及拉斯彭馬斯,都難言成功,2017-18球季喺拉斯彭馬斯更因傷多過踢,令外借草草結束。

對森柏最不利嘅係佢喺陣式上主要出現嘅位置,係防守中場或所謂墮後中場,而巴塞中場喺老臣沙維同恩尼斯達離隊後,剩低嘅亦係地位不可動搖嘅布斯基斯。位置推前一格的話,巴塞亦有拉傑迪及維度;年輕球員方面,亦寧願用新加盟嘅艾法美路 (Arthur Melo) 或艾蘭拿 (Carles Alena) ,連丹尼斯蘇亞雷斯亦因出場時間不足,喺季中被阿仙奴借走。直至離隊前,森柏今季各項賽事只為巴塞一隊上陣過一場國王盃比賽,出場時間更只得33分鐘。

巴塞隆拿官方發表聲明,宣布同沙治森柏達成協議,同意取消球員合約,俾佢自由身離隊。巴塞會為沙治森柏於當地時間3月5日下午1時召開記者會,又喺聲明中感謝呢位青訓球員多年嘅服務,祝願佢有美好前程。


令人意外嘅係,森柏傳聞中嘅下一站將會係日職嘅神戶勝利船,神戶陣中除咗擁有前巴塞中場大師恩尼斯達及前德國國家隊射手普度斯基之外,今季更有同樣曾效力巴塞嘅大衛韋拿加盟,若傳聞成真的話,相信森柏可以為神戶中場注入活力,同時重建信心。


Source: GoalMarcafcbarcelona

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→