利迷遇襲危殆,羅馬迷涉意圖謀殺被捕 名宿向利記會徽舉中指後道歉

睇足365 於 25/04/2018 發表 收藏文章
歐聯四強首回合,利物浦主場大戰羅馬,大家都知利物浦晏菲路主場氣氛熾熱,加上領隊高普嘅激情更足以鼓動球迷,羅馬球迷作客可能想施個下馬威,唔好被利迷氣勢壓住,但搞到過晒火就唔好喇。

據《BBC》及《Sky Sports》報導,喺比賽開始前,球場附近發生一宗嚴重傷人案,事件中一名利物浦球迷重傷,多名羅馬球迷被捕。


報導指喺開波之前,大約80名羅馬球迷通過小路抵達一處利物浦球迷聚集嘅地方 Venmore Street,雙方球迷發生衝突,有人拍到一班相信係羅馬球迷嘅黑衣人,揮武皮帶、投擲雜物,甚至手持鐵鎚。一名53歲利物浦球迷被發現於 Albert pub 外頭部受傷倒地,送院後情況仍然危殆。



《BBC》指有7人因襲擊、嚴重襲擊、持有攻擊性武器等嫌疑被捕,警方事後聲明稱有兩人因涉嫌意圖謀殺被捕,又透露有目擊證人指受害人被皮帶擊中後跌落地上。



另外,兩名羅馬名宿賽前向利物浦會徽舉中指拍照,分別係球會傳奇人物干迪(Bruno Conti)及射手普素(Roberto Pruzzo),兩人喺相片被報導後道歉,稱只係私下開玩笑,估唔到會被拎出嚟講,如果有任何人感到被侮辱,佢哋都好抱歉。


其實每隊都有害群之馬,利迷都有非善男信女之輩,佢哋早前都曾經有人喺八強賽前襲擊曼城隊巴。去到利記主場,羅馬球迷都咁勇武,次回合去到羅馬真係場內場外都係一場硬仗,不過氣勢還氣勢、威還威,相信冇人想睇場波都搞出人命囉,希望雙方都克制少少啦。

Source: SkySportsBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→