冇揀錯Number?古圖斯批評恩師施蒙尼:「佢講嘢只係想搏出位」

睇足365 於 17/12/2018 發表 收藏文章
皇家馬德里門將古圖斯 (Thibaut Courtois) 今季加盟以嚟,表現備受質疑,普遍認為皇馬原一號門將基羅拿華斯比起古圖斯毫不輸蝕,但卻被貶後備;除此之外,古圖斯於場外負面新聞甚多,包括曾經與迪布尼女友有染,現時又以前馬德里體育會球員身分加盟死敵,兼言語間不斷讚皇馬、踩馬體會,不少球迷已經將「二五仔」 (叛徒) 外號同剛好身穿25號球衣嘅佢劃上等號。


馬體會主帥施蒙尼最近曾經對今屆金球獎發表評論,質疑皇馬中場摩迪唔值得拎金球獎,佢話愛徒基沙文為法國贏得2018世界盃,比起摩迪更應該獲獎,甚至同為法國球員嘅皇馬後衛華拉尼,都更值得拎金球獎。之後,佢又表示,古圖斯之所以拎到 FIFA年度最佳門將,只係因為佢效力皇馬。


古圖斯就隔空向恩帥反擊:「施蒙尼經常批評皇馬,令自己喺球迷間變得更受歡迎。佢永遠都係咁樣做,令自己成為全世界最好嘅人。

每個人嘅意見都應該得到尊重,每個人都可以講出自己嘅睇法。不過,我喺馬體會效力三年,當球隊要面對皇馬呢支世上最強嘅球隊時,就一定要講啲嘢去產生民粹情緒。
關於我嘅問題,佢話我拎 FIFA年度最佳門將係因為我踢皇馬,但其實我踢世界盃嗰陣仲係車路士球員,同埋投票喺七月已經結束咗。奧比歷 (馬體會門將) 都係一個好好嘅門將,佢都可以拎到更多分數,不過投票嘅係大家。」

古圖斯2011年轉投車路士前,雖然已經係亨克重要一員,但當時車路士已經有施治把守大門,未經歐洲主流聯賽考驗嘅古圖斯只被視為一筆投資,馬上被外借到馬體會效力3季,正係呢段時間令佢被認可為一位有級數嘅年輕門將,返回車路士奪取正選席位。由佢為亨克 (41) 、馬體會 (111)、車路士 (126) 嘅上陣次數可以睇出喺馬體會嘅經歷對今日嘅佢係幾重要。施蒙尼固然一直係一位充滿爭議性嘅人物,但喺佢手下被栽培成材嘅球員去批評佢,似乎唔太恰當囉。


古圖斯又何嘗未講過「我愛馬體會,皇馬係垃圾」之類嘅說話呢?呢啲說話都唔見得每人個馬體會球員都會走出嚟講,如果古圖斯當初咁講係真心,咁佢而家又話加盟皇馬係兒時夢想,係咩心態呢?如果佢當初唔係真心,即係佢就係自己所講搏出位嘅人?一個球員可以冇乜球迷撐得落,真係有原因!

Source: Goal

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→