【全場眼濕濕】恩尼斯達宣佈離隊,淚灑記招:「我永遠唔會對返巴塞,所以會離開歐洲」

睇足365 於 27/04/2018 發表 收藏文章
巴塞隆拿傳奇球星恩尼斯達離隊已經傳完又傳,佢喺西班牙周五於巴塞召開記者會,正式公布將會喺今季結束後自由身離隊,淚灑當場。

「小白」恩尼斯達現年33歲,巴塞拉瑪西亞青訓出身,2001年正式成為職業球員,至今一直效力呢間母會,當年同沙維、布斯基斯組成三人中場線,由巴塞到西班牙國家隊同樣取得成功,最令人難忘係喺2010世界盃決賽對荷蘭,於加時射入奠勝一球,捧起大力神盃。喺巴塞,「小白」一共贏得8個次西甲冠軍 (未計算2017-18球季,但巴塞今季奪冠已無懸念,所以應為9次西甲冠軍)、4個歐聯冠軍。


「小白」上周出戰西班牙國王盃決賽,比賽末段被調離場,全場觀眾起立致意,佢亦眼泛淚光,皆因呢場波係佢喺巴塞最後一場盃賽決賽。巴塞喺周五為佢召開記招公布離隊消息,不少隊友出席「撐場」,但美斯及蘇亞雷斯因私事缺席。



佢喺記者會上話:

「今季係我喺呢度嘅最後一季。

呢個決定,我經過好長時間嘅考慮,亦同家人商量過。

多謝隊友、所有在場嘅人、職員、球迷,我想多謝你哋。」

「今日要喺度告別巴塞,係好困難嘅一日,因為我一生都喺呢度渡過。我可以成為今日嘅我,好大部分係巴塞同拉瑪西亞塑造出嚟,我好感激佢哋。」

小白並冇明言去向,但就話一定唔會喺巴塞落班:「我講過永遠唔會同巴塞對敵,所以我下一站唔會喺歐洲。一切喺季尾就會有結果,仲有好多嘢傾緊。」



雖然「小白」最終冇辦法成為 one club man ,但一定係巴塞嘅傳奇。外昌盛傳佢將會加盟中超球隊,爭在係曾經有傳會同佢嘅酒莊合作嘅天津權健,定係最新傳出重慶力帆,或者美職球隊,都未可知。


記者會官方完整片段:

Source: BBC、FC Barcelona、Guardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→