保方:兩星期前仍打算退役,但收到吸引嘅報價

睇足365 於 18/05/2018 發表 收藏文章
祖雲達斯門將保方最近喺記者會上宣布,今季意甲結束後,將會離隊,但暫時未有退休打算。外間曾經預期,保方一旦離開祖記就會同時退役,所以今次嘅決定多少令球迷感到意外。


對於保方嘅去向,有不少猜測,有球迷建議保方返回母會帕爾馬退役,其實保方喺記者會上已經回應過呢個問題:

「返去帕爾馬係一個好浪漫嘅兒時夢想,不過我唔會咁做喇。我肯定唔係嗰種會喺低組別退役嘅人,因為我係一個爭勝心重嘅人,唔能夠應付嗰種情況。」


咁究竟保方嘅去向係點?原來佢喺兩星期前曾經考慮直接退役,不過而家仍然考慮緊:

「直至兩個星期之前,我都肯定自己將會掛靴,不過而家我收到好多來自場外場內吸引嘅報價,其中如果我唔再踢波,最吸引我嘅場外工作係由 Andrea (祖雲達斯主席) 開出嘅。我會喺下星期決定自己想做咩。」

雖然保方已經年屆40歲,但老牌門將中仍然被視為當今一流門將嘅已經唔多,例如前皇馬隊長卡斯拿斯、阿仙奴門將施治等都被認為下滑不少,所以保方作為市場中少數極具級數及經驗嘅門將,仍然十分受歡迎。近日有關轉會傳聞不絕,可信程度各異,包括皇家馬德里、巴黎聖日耳門、利物浦等,都盛傳有意羅致保方,但保方應該唔會選擇去只能擔任後備嘅球隊,而皇馬一直傾向年輕力壯嘅迪基亞或古圖爾斯,所以基本上冇可能,保方似乎更乎合巴黎聖日耳門一貫嘅轉會策略,利物浦對保方嚟講可能太刺激,所以個人相信PSG機會較大。


Source: GuardianESPNTelegraph

留言


請按此登錄後留言。未成為會員? 立即註冊
    快捷鍵:←
    快捷鍵:→