你識唔識欣賞?曼聯2020農曆新年特別版球衣設計流出

睇足365 於 01/11/2019 發表 收藏文章
「為人民幣服務」對於好多香港人嚟講可能係負面事情,不過如果換位思考的話,你會明白對於歐洲球會嚟講,佢哋會認為理所當然,負責處理球會商業事務、搞市場拓展嘅人,好難忽視14億人嘅市場,更加可能有嚟自其他合作品牌嘅壓力。


難怪每逢去到中國節日,各大球會都會搞活動、拍片,甚至著起特別球衣比賽,去吸引中國市場關注,其中意甲球會羅馬嘅「拜個早年」球衣更成為「災難級」經典,不過你咪理,總有人會感覺良好,而且「三分已袋,理L得你」根本就係生意人嘅一貫思維模式。

今次就輪到英超球會曼聯!曼聯作為世上其中一支最多球迷嘅球隊,佢哋喺中國同樣有龐大嘅球迷基礎,今次有傳佢哋將會推出一件農曆新年版球衣。根據一向專門報導各大球會球衣流出新聞嘅Footy Headlines,曼聯呢件2020農曆新年特別版球衣係咁樣樣:

loading


唔知你識唔識欣賞,我就唔識欣賞,大大條龍喺件衫到,但成件衫嘅設計有一種阿伯底衫嘅感覺。如果你都係咁諗,咁你就應該感到十分慶幸,消息指曼聯係唔會著起呢件衫踢比賽,佢只係以純商品方式發售。


當然,今次嘅幕後黑手應該係運動品牌「三間」,可能佢哋做過市場調查,認為target地區嘅顧客品味就係咁獨特!可怕嘅係,報導指出,「三間」仲會為阿仙奴、拜仁慕尼黑、祖雲達斯及皇家馬德里準備2020農曆新年系列商品,唔知會唔會又再引起時裝災難呢?

Source: SportbibleFooty Headlines

留言


請按此登錄後留言。未成為會員? 立即註冊
    快捷鍵:←
    快捷鍵:→