【球場點滴】「幾時踢飯呀?」發人心省的獨白

世界波 於 19/05/2016 發表 收藏文章
「幾時踢飯呀?」發人心省的獨白

睇左個標題,一定有好多讀者打曬問號,究竟係咪打錯字?定有背後含義?其實,筆者邊有咁高既深度呀?純粹無病呻吟,同大家一齊吹下水;一切,緣於一個死黨whatsapp group既一句。

「幾時踢飯呀?」係由一個朋友group中既熱血份子提出但打錯字,原意係想帶出好耐無見,不如出黎食飯啦,所以想問幾時食飯。但係話到明死黨group,見你打錯字仲會放過你?一定會出現一大班抽水黨,接下來,就係不下數十句「幾時踢飯呀?」「飯幾時踢呀?」「波幾時食呀?」,之後正常會有30分鐘空白時間,因為你同我都唔夠膽出聲講,「係咪認真嫁?」「踢波食飯我都ok呀!」其實幾時出現呢個情況?都好幾年前喇,當你發現時間慢慢唔係掌握係你手中...

筆者,一個80後,讀書個陣又唔勤力只係掛住玩同踢波,純靠好運過考試關,一有時間就會約人踢波做運動,或者有人叫到就即時蒲頭,從來到唔覺得約踢波係一件咩難事。畢業後,同學們各散東西,開始為生活打拼,被工作壓到抖唔到氣,慢慢就會連自己活動既時間都要諗過度過先決定到。

足球係群體活動,至少五個人成團,當你以爲「時間就像乳溝一樣,劑一劑就出黎喇!」可以應用係大家身上,「唔好意思,少年,你太年輕了!」因為我所有朋友都真係好瘦,佢地點劑都無 · 乳 · 溝!唔係話要OT,就話唔係香港,又話陪女朋友或屋企人,仲有想放假訓耐d,種種原因都令到我地呢班波友由糖痴豆變成「這麼近,那麼遠」既朋友,灰唔灰?

「時日無多,竟不敢偷懶」,試過按捺不住,自已單拖走入球場話跟隊,d後生仔望住我都心諗「講呢d?!」「唔好玩啦,得一個人跟咩隊?」,又或者到真係跟到隊後又見人拎場紙話book左場,「咁你唔早講?」「等_左咁耐?」「下次搵人排街場book曬佢」。大家已經去到上樓梯會比人問「無見一排,原來你有關節痛?」既日子。
咁究竟「幾時踢波呀?」相信最快同可行既方法就係同朋友上網打Winning或者FIFA ,最多加埋對講function一路打一路好似呀叔咁講波令成件真實d形象化d!

約踢波難,約食飯應該容易d掛?每個人都要食飯,只係睇下餐牌貴定平,食既菜色岩唔岩胃口。咁耐無見,花費兩個鐘見過面傾下計,以爲好易約?唔知咩原因,如果你係個whatsapp group到問「幾時食飯呀?」「好耐無見,出黎聚一聚」「下星期德江生日,不如出黎同佢慶祝!」你會發現有兩種情況:
一,對住空氣講野,「姜太公釣魚 - 願者上釣」,釣得耐你都知魚係揀飲擇食,無人回你,過多一兩日,就會打消念頭。不過,提提各位千其唔好check邊個睇左,你都唔想下次同某_ _見面會明阻阻啦。

二,反應熱烈,仲話唔成功?一講完幾時食飯,不下數十個message「好呀,約啦」「好耐無見喇」「講低時間地點,即到」當你眼見成功之際,就會有小分支出現,你發現全部人都係講但無人帶頭搞,有人搞個陣就會好多意見分歧,或者無啦啦有人講「琴晚打division 個陣同呀Fred打出左金裝...」「咁正,幾時一齊打?」完全搶左個focus,之後就變左打機live group,去到凌晨3點都係粗口橫飛既message。
如果你夠不屈不撓,keep住煩同滋擾你既朋友,相信你一定會搶番focus同埋約到食飯,不過出到黎好大機會都係圍繞著Division打機呢個話題!

「幾時踢飯呀?」變左一個好困擾既問題!正正係呢句錯句,絕對值得大家反思時間安排既重要性,想約踢波既,有心無力,想約食飯既,就攀山涉水!究竟係社會既冷酷,定係人大左諗法改變,呢個答案真係自己先知。
「有一種幸福叫踢飯」呢一刻剩係知,幾時踢波,幾時食飯都好,筆者都超級無敵十分非常想做,最多我上網背左個<The Division>攻略先出黎喇,約人啦大家,仲係到睇..

- 謝利
特別鳴謝 : 大埔樂仔, 錦上路大鵰哥

P.S. 特別附上Division 攻略 (等大家備用) :
http://www.gamekong.hk/ps4/2016/03/10/%E3%80%90%E9%81%8A%E7%8C%BF%E6%94%BB%E7%95%A5%E7%B5%84%E3%80%91%E3%80%8Athe-division%E3%80%8B%E7%89%B9%E5%B7%A5%E5%BF%85%E9%A0%88%E7%9F%A5%E9%81%93%E7%9A%84%E5%8D%81%E7%A8%AE%E6%8A%80%E5%B7%A7

歡迎大家上黎世界波一齊講下波,風花雪月一番
你嘅LIKE係我地嘅原動力
https://www.facebook.com/hereisworldball
最新Instagram :WORLD_FOOTBALLHK

世界波最新競爭遊戲 : 歐國論戰 - 快D入黎我地個page估下邊個國家會嬴歐洲國家杯啦!!
https://www.facebook.com/hereisworldball/posts/1746243802280795
PES Club Manager 世界波聯盟 :
https://www.facebook.com/hereisworldball/posts/1747474662157709

如果喜歡我們的文章,請即分享到︰

標籤: 世界波  朋友  聚會  踢波  食飯  

留言

會員
我要評論
請按此登錄後留言。未成為會員? 立即註冊
  • ShunFei
    ShunFei 於 20/05/2016 評論 NO. 1

    廢文,一篇垃圾

  • watercow
    watercow 於 20/05/2016 評論 NO. 2

    係就係廢 不過我好有共鳴

快捷鍵:←
快捷鍵:→