<E波Live> - 意大利歐洲國家盃28人習訓名單公佈 精選

意大利國家隊主帥Conte岩岩公佈左歐洲國家杯28人初選大名單，不過由於祖雲達斯同AC米蘭仲有一場意大利杯決賽未打，因此兩隊多名球員都暫時未有入選呢份名單。

唔計祖雲達斯同AC米蘭球員，Conte 今次呢份名單都有成28人，估計佢想係習訓期間睇下一D年青球員既表現，從而幫國家隊搵到最合適既人選，所以呢份名單入便，足足有7位未代表過國家隊既新面孔。

佢地分別係 史樸迪路(阿特蘭大) (1992年出生)

A.艾素(熱那亞) (1992年出生)

東尼利(安波里) (1990年出生)

賓拿斯(拖連奴) (1994年出生)

卡達迪(拉素) (1994年出生)

沙柏哥斯達(拖連奴) (1992年出生)

柏禾列迪(熱那亞) (1988年出生)

係咪發覺好多都好陌生呢? 鬼咩? 宜家呢個年頭，叫你數晒AC同國米成隊波有咩人，我諗好多人都未必數得出，畢竟意甲近年真係距離我地遠左少少。

另外，新特蘭前鋒波連尼、博洛尼亞門將米蘭迪都係干地入主國家隊之後第一次入選，羅馬中場迪羅斯亦都入選左呢份預選名單，之不過係美國大聯盟踢緊波既派路同基奧雲高就無奈落選呢份名單，資深意迷未免會感到可惜。另外，馬治斯奧同華拉堤兩位中場大將早前以宣佈因傷無緣呢項大賽。


值得一提既係，邦路斯因為會係意大利杯決賽停賽，所以Conte 亦都先選左佢入呢份名單，不過，祖雲達斯就拒絕左提前放人。

以下係意大利28人習訓大名單

門將：馬捷迪(拉素)、米蘭迪(博洛尼亞)、史樸迪路(阿特蘭大)

後衛：阿沙比(薩斯索羅)、艾斯托利(費倫天拿)、邦路斯(祖雲達斯)、A.艾素(熱那亞) 、奧邦拿(韋斯咸)、東尼利(安波里)

中場：賓拿斯(拖連奴)、貝拿迪斯治(費倫天拿)、簡達華(拉素)、卡達迪(拉素)、迪羅斯(羅馬)、迪施維斯查(森多利亞)、艾沙拉維(羅馬)、費奧倫斯(羅馬)、基亞卓連尼利(博洛尼亞)、佐真奴費路(拿波里)、馬高柏洛路(拉素)、蘇利安奴(森多利亞)、沙柏哥斯達(拖連奴)

前鋒：波連尼(新特蘭)、艾達馬田斯(國際米蘭)、恩莫比尼(拖連奴) 、恩斯治尼(拿波里)、柏禾列迪(熱那亞)、柏利(修咸頓)


歡迎各位讚好E波Live專頁
https://www.facebook.com/eballlive個人專頁又得
https://www.facebook.com/talkativegm