新兵融入,有快有慢

車路士淺論 於 31/07/2017 發表 收藏文章
上文筆者已提及,其實想講下新兵融入。玩過Football Manager既人都知,佢會話你聽一次過簽太多新兵,會破壞球隊平衡。遊戲已經如此,何況現實?


今季AC米蘭一反常態,得到新班主提供資金後,怒簽多名實力戰將,諸如邦路斯(Bonucci)、碧利亞(Biglia)、梅沙基奧(Musacchio)、查漢奴古(Çalhanoğlu)、R.洛迪古斯(R.Rodriguez)等,多達十名新兵來投。老老實實,姑勿論財政公平條例既問題(其實買得應該無乜大問題),筆者對AC米蘭新賽季既表現有啲擔憂。雖然佢地多數係有經驗既球員,並非全部係年青小將,加上有幾名都係其他意甲球隊轉投過黎,適應上應該難度唔太大。之不過,去到一個新環境,點都要一啲時間融入、適應,仲要一時間咁多勁人,多數會佔去一半以上主力位置,佢地點處理成績壓力、適應打法,將會好影響球隊表現。


當然,除左睇球員努唔努力訓練、適應外,其實領隊點安排合適戰術,同埋點同佢地溝通、幫助佢地適應生活、戰術等都係考驗領隊功力既地方。比如上季車路士其實戰術變化幅度都好大,但新兵馬高斯阿朗素(Marcos Alonso)、簡迪(Kante)等迅速融入到戰術,而舊將包括要轉位置既艾斯派古達(Azpilicueta)都係新戰術發揮理想,最終摘下桂冠。蒙迪拿(Montella)點樣安排返戰術去令新舊球員磨合,都考驗佢既功力,如果順利發揮同保持穩定發揮,應該可以有力挑戰祖雲達斯既霸主地位,尤其對方都有主力轉換既問題要適應。


不過值得一讚係球會好快完成大部分收購,有時間訓練同磨合,呢點絕對有利佢地發揮。好似當年阿仙奴一筆過簽入阿迪達(Arteta)、梅迪薩卡(Mertesacker)等,臨轉會窗完前收購,效果必然有限。而就算有時間,方式唔岩都影響新兵融入既效果,正如當年熱刺賣巴爾(Bale)、利物浦賣蘇亞雷斯(Suarez)後,簽入一批球員,但短期就唔見有咩效果出到黎。且睇下AC米蘭來季磨合進度係咪合符預期,有無機會成為繼早前羅馬後挑戰祖記既勢力。


多謝各位不吝賜評,一like一支持,多承指教:
https://www.facebook.com/chelsea.gor.sk

標籤: ac milan  

留言


請按此登錄後留言。未成為會員? 立即註冊
    快捷鍵:←
    快捷鍵:→