真.射手觸覺?日本J2聯賽出現神奇入球,接應超靚長傳撞到仆地一樣識入波

馬後炮 於 09/09/2019 發表 收藏文章
「世界波」通常都係一啲超級遠射,但其實一啲令人驚嘆嘅精彩入球都可以稱為「世界波」。最近,日本聯賽出現一個精彩入球,既有精彩長傳、又有幸運成份,一齊欣賞下!

9月8日,日本次級聯賽 J2 進行第31輪賽事,由中游球隊岡山綠雉 (ファジアーノ岡山FC) 主場對前列分子京都不死鳥 (京都サンガF.C.) 。呢場比賽吸引咗13098人入場觀看,不過畢竟係 J2 ,喺國外都唔會太多人留意,多得其中一個入球,成為熱話。

loading

喺比賽接近22分鐘,岡山綠雉中場上田康太放出超靚長傳,直接吊入禁區12碼點,正正位於京都不死鳥防線同門將中間嘅尷尬位置,仲間隼斗突破越位陷阱入楔成功,第一時間頭槌攻門,同時京都不死鳥門將出迎趕到。


仲間隼斗頭槌頂向空門,隨即與門將相撞倒地。可惜,個波剛剛好中柱彈出。當時仲間隼斗估計啱啱同對手門將「炒埋一碟」,好難知道自己喺邊、個波喺邊,但偏偏個波中柱之後彈正向佢嘅方向,而佢由偏偏轉身向龍門方向,結果真係俾佢用腳射返入網。

https://i.imgur.com/nTyONWY.gif
睇咗片段N次之後,筆者覺得仲間隼斗係有意識咁做,佢撞完碌落地之後,有望向龍門方向,而個波彈到佢身邊時佢亦剛好有腳部動作,可以話係嚟個半窩利。咁樣嘅話,除咗好好彩個波反彈飛向佢腳邊,亦要佢轉數快,搵波快,所謂射手觸覺有時就係要喺混亂中鬥快搵波,所以有啲球員「執雞」特別多唔係冇原因。

loading

最後都要介紹返呢位主角,27歲嘅仲間隼斗職業生涯從未於J1登場,此前效力過熊本羅亞素 (ロアッソ熊本) 及讚岐卡馬達馬尼 (カマタマーレ讃岐) ,兩隊同樣征戰J2,但於2018球季同樣護級失敗,今季要J3見。雖然仲間隼斗並唔係乜嘢球星,但呢位司職左中場、偶爾幾場客串前鋒嘅球員門前觸覺應該十分敏銳,因為佢乞季J2上陣31場,已射入11球及交出5個助攻,十分高效。

loading


岡山綠雉今場最終以3-0大勝名氣較大嘅京都不死鳥,升上聯賽第9位,而京都不死鳥就跌落第6位,正正暫時佔據升班附加賽區域最後一名,雙方差距縮窄至3分。

留言


請按此登錄後留言。未成為會員? 立即註冊
    快捷鍵:←
    快捷鍵:→