【不勝唏噓】經典重溫八年前加利夫巴爾摧毀馬干,有呢個巴爾皇馬會搞成咁?

馬後炮 於 03/11/2018 發表 收藏文章
當年今日永遠係有趣嘅話題,喺歐洲時間2010年11月2日晚上,亦即係香港時間11月3日清晨,歐聯分組賽上演一場經典戰役,熱刺主場3-1擊敗國際米蘭,連同前一個循環,國際米蘭 4-3 熱刺,堪稱加利夫巴爾嘅成名作之一。


2010-11球季係加利夫巴爾正式由左閘改踢左翼,亦令佢走上成為世界級球星之路。先喺2010年10月20日一場歐聯分組賽,熱刺作客面對國際米蘭,當時國米剛剛喺上季勇奪三冠王,陣中擁有伊度奧、史尼達、辛尼迪、盧斯奧、馬干等猛將,仲有今日嘅巴塞中場古天奴。首循環呢場比賽,國米喺上半場由辛尼迪先開紀錄,之後熱刺門將靴里路高美斯「食全餐」被逐兼輸12碼,導致國米輕鬆領先4-0;不過去到下半場,加利夫巴爾喺左路頻頻發難,連續以三球近乎一模一樣嘅左路左腳窄位抽遠柱,完成帽子戲法,技驚四座,但國米仍贏4-3完場。


分組賽首循環 - 國際米蘭 4-3 熱刺
https://streamable.com/eh9tu
去到次循環,熱刺喺主場迎戰國米,主場優勢兼唔使踢少個之下,熱刺有本錢主攻,令巴爾有更多機會帶球突破,直接挑戰國米右閘馬干。一度被評為世界最佳右閘,兼且憑三冠王球季表現當選UEFA年度最佳後衛、入選金球獎候選名單嘅馬干,當時29歲正值球員生涯盛年,但面對21歲年輕力壯嘅巴爾,仍然顯得力不從心,多次被巴爾用速度硬爆。巴爾呢場不及上循環鋒芒畢露,未有入球進帳,而且專心為隊友服務之下,暴露傳中質素不佳嘅弱點,但仍然收獲兩個助攻,助熱刺3-1擊敗國米。

loading


分組賽次循環 - 熱刺3-1國際米蘭
https://streamable.com/uvhvf

兩個循環面對國米嘅表現,成功說服眾人,加利夫巴爾有能力挑戰世界一流後衛及球隊,佢喺人生首個歐聯旅程中,上陣11場,貢獻4入球9助攻 (連同2場附加賽) ,說服力十足。無疑巴爾喺前一球季已開始受到更多注視,但令呢次大爆發亦令各大球會爭搶佢嘅決心更大。巴爾當時接受訪問表示自己季前先同球會續約四年,傾向繼續履行合約,結果佢果然喺2013年即係合約最後一年,先以據報9,100萬歐元轉會費加盟皇馬。

https://i.imgur.com/HaMr1kM.gif
https://i.imgur.com/RCEMzka.gif

如果巴爾今時今日有呢個狀態,可唔可以挽救皇馬嘅頹勢呢?

留言


請按此登錄後留言。未成為會員? 立即註冊
    快捷鍵:←
    快捷鍵:→