一單還一單,拉莫斯貼影片反撃證未踐踏史達寧

馬後炮 於 18/10/2018 發表 收藏文章
近日一場歐洲國家聯賽,西班牙對英格蘭,西班牙後衛沙治奧拉莫斯疑似踐踏英格蘭翼鋒史達寧,惹起批評。本欄亦曾經發表《【賽後熱話】拉莫斯疑似偷踩史達寧,艾歷迪亞剷到拉莫斯飛起領黃竟贏盡掌聲?》,唔少球迷留言批評拉莫斯,最近沙治奧拉莫斯喺個人Twitter發放相關片段回應,為表公允,小弟都要share返新證據,幫佢「平反」返。


當時史達寧已經喺禁區內倒地,拉莫斯經過同一位置後,疑似同史達寧有接觸,史達寧狀甚痛苦,因此有網民懷疑拉莫斯故意踐踏史達寧。


事實上,小弟喺前文中已經指出兩點:

(1) 史達寧一向屬於喜歡插水及誇張放大接觸程度嘅球員;

(2) 影片角度並冇清晰影到拉莫斯踐踏史達寧;


不過,小弟認為有一點對拉莫斯不利,就係 (3) 難以解釋佢點解會走向史達寧倒地之處,啱啱好去到嗰個位置後先轉彎離開禁區,而佢好大機會一早見到史達寧喺嗰個位,所以佢有可能係故意埋去抽水。 (不過好老實講,就算睇咗以下新證據,客觀嚟睇,都未可以完全否定呢個第3點,始終「想抽水」同「抽唔抽到」係兩回事。) 詳細解釋請睇返前文。



可能係網上批評十分激烈,拉莫斯忍唔住喺Twitter上發布一段影片,對應上述第2點,呢個角度可以見到,拉莫斯應該係冇踩到史達寧嘅。

必須要再次利申,本人對以上事件中相關人物及球隊冇任何喜惡。所以,為免單方面傳遞咗對拉莫斯不利嘅消息,都要為拉莫斯「平反」返,如果前文曾經令你「跟車太貼」的話,僅此致歉。即使拉莫斯過去紀錄不良,但一單還一單,今次冇踩就係冇踩,要還佢清白。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→