《遊走豪門的藝術家 - 班拿約》

藍獅 於 12/04/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


相信如果你有留意開英超一段唔短既時間,對哩位人兄都一定有認識,被球迷稱之為「白粉佬」,當然都只係形容佢既外面,至於實際能力同技術,相信有睇過佢踢波都唔需要懷疑,如果你話路斯基係阿仙奴既莫札特,咁今集既主角班拿約就係遊走豪門既藝術家。

經已淡出主流聯賽好幾年,班拿約以三十有八之齡正式宣佈退役,回頭望番以色列人既足球生涯,最為人認識就必定係喺英超效力既九年時間,喺哩段時段當中班拿約大大小小效力過五支英超球隊,其中仲要包括當年仲係「Big4」年代既利物浦、車路士以及阿仙奴哩三支勁旅,而且仲要喺隊隊都交足貨無甩拖,試問如果無番咁上下實力又邊有可能同時能夠喺哩三隊度立足。

班拿約左右腳既運用都非常出色,喺優秀既技術根底下盤球能力亦都相當出眾,加上亦能自己埋門,可以話係其他英超後衛既惡夢,有速度同技術可能話過你就過你,你想撞佢佢又未必跌,就算佢跌左又可能博到犯規,基本上係一個好洗好用既進攻球員,而喺利物浦既成長可以話將班拿約推到大賽舞台上,令世界唔少球迷都認識到哩位以色列既中場球員。

繼後亦隨住費蘭度托利斯既腳步轉投死敵車路士,其實當初藍軍買佢既原因好大程度就係為左激活哩位「西班牙王子」,同時為林伯特同艾辛哩啲剛強既中場之中加添一點技術味道,對於當時唔少車迷黎講的確幾有新鮮感,可惜其後有馬達既加盟,位置同戰術職責上都有重疊既地方,最終藍軍選擇將佢外借到阿仙奴。而喺槍手短短一季既球員生涯之中,班拿約既表現絕不失禮,更令唔少阿仙奴球迷希望雲加買斷,但最終都未能成事。

而職業生涯尾段班拿約選擇回流到自己家鄉以色列聯賽效力,希望以一啲平淡以簡單既足球生活作終結,不過無論過左幾多年,相信球迷對哩位遊走豪門既以色列藝術家印象依然深刻。


文章最後更新時間 : 12/4/2019 10:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  班拿約  利物浦  阿仙奴  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→