《連巴克利都打番起 真禾特你又何必繼續蹉跎歲月?》

藍獅 於 17/10/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Coral

踏入國際賽期,不少睇開聯各大聯賽既球迷亦可以休息一番,注視於個別國家隊,而較多人討好既英格蘭今次亦選入左幾位年青新人以及重召一些久違既名字。至於今集想講既主角真禾特,就連個名都開始漸漸喺英格蘭之中消失,雖然依加喺車路士得到一份相當可觀既週薪,但眼見同鄉兼後輩巴克利開始得到唔少機會上陣打番起並再次入選英格蘭國家隊,反觀自己每場賽事就只能在看台上觀看隊友作賽,哩種感覺,真係好受嗎?

老實說,論質素,真禾特由出道至今都唔係一啲以技術作賣點既球員,只係以勤力、跑動覆蓋面見稱,而論實力,的確佢對英超列強球隊黎講算係平庸,同時佢亦唔係啲有名氣既球員。不過貴為當年李斯特城童話式奪冠一員,佢同簡迪之間既配合的確係幾有火花,再加上英格蘭人哩個身份,令佢得到左一登龍門既機會,缺乏英人既車路士選擇向李城特城提出收購,交易最終亦以3500萬鎊轉會費成交。

相比於巴克利果1500萬鎊,真禾特哩3500萬鎊可以話價值不菲,加上哩單交易仲要係喺最後一刻向英格蘭足總申請延長轉會時間至能夠達成,其實如果當時真係有心同人買,又點會拖到最後哩一刻先至走去同人傾?哩單交易好明顯都係管理層意思黎,始終藍軍隊中英人數目唔夠,只係得加利卡希爾叫做純土炮,之後就係法比加斯、摩西斯以及一堆青年軍頂住個本土名額。不過喺時任主帥干地手下既真禾特相對於巴克利都叫做較多機會上陣,意大利人激活左「飲水哥」既進攻能力,比起以前淨係負責喺後場長傳吊個高波上前,更加需要佢著重於直接用腳將個波運上前場。

可惜既係一朝天子一朝臣,依加既真禾特無疑並唔係沙利「杯茶」,先係歐霸盃無幫佢登記,之後就連聯賽或者一啲本土盃賽既後備名單亦都唔知幾耐無見過佢名,佢根本上都不在球隊規劃藍圖之中,其他中場隊友法比加斯、巴克里、路夫斯捷克各自都有輪換上陣,但真禾特就連一次既機會都無,話就話可以袋住份高薪,但連盃賽仔都無得上陣其實都真係幾難堪,只能夠希望一月轉會窗開啟時,球會能夠喺轉會費或者租借費入面作出適當讓步,始終「飲水哥」對於一啲英超中游球隊黎講都絕對係一個好洗好用既球員黎。

真禾特,別再浪費光陰,別再蹉跎歲月吧。


文章最後更新時間 : 17/10/2018 12:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  真禾特  沙利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→