《賽後有感》車路士亞洲之旅正式結束 球隊與干地有何得著?

藍獅 於 31/07/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

車路士正式結束亞洲之旅,最後一場賽事以1-2不敵國際米蘭,似乎好多球迷都對球隊今次既季前熱身賽成績感到不滿,同時亦有好多問題出現左。車路士全軍已啟程返回倫敦,備戰下星期對陣阿仙奴既社區盾賽事,究竟今次既亞洲之旅成效又有幾大?球員或是干地又有何得著?一齊分析一下。
.圖片來源 : IOL

之前都為大家總結左對拜仁果場波,主要講左一啲球隊遇到既問題,去到今場對陣國際米蘭賽前干地話會以最佳十一人應戰,不少人都憧憬會唔會擺出一個新陣式應戰,結果出到黎既只係將莫拉達代替保加為左邊攻擊正選,繼續以343陣式出戰,同時大衛雷斯取代小將基斯甸臣繼續握守中路,未開賽前見到哩個正選名單,令人比較詫異既係將莫拉達既位置,干地並沒有將西班牙人放到熟悉既中鋒位,反而將佢放喺邊路上面,令球迷諗哩個究竟係「咩玩法」?

傳送門:《詳細分析》經歷拜仁獲贈一場敗仗 車路士既問題基本上已經全部浮現
.圖片來源 : SofaScore.com

果然,莫拉達喺哩個位置上並未有顯示出關鍵作用,大多數時間都係做駁腳角色,更喺下半場時間被干地換出。另一邊箱,巴舒亞伊接近踢足全場,未有延續之前強勢取得入球,埋門及處理手法亦有待磨鍊,而韋利安多次喺進攻時喺唔望人既情況下交波,唔單止令球隊終止攻勢,更白白地將控球權拱手相讓比對手製造反擊機會,即使係熱身賽亦不應發生哩一啲低級錯誤。到中場方面,人手不足之下繼續以法比加斯拍擋簡迪為雙中場,而國米以4231既陣式控制左大部份既比賽時間及節奏,基本上過於密集下車路士喺中場都造唔到波,好多時都只能夠透過邊路運送上前場。
.圖片來源 : Passioneinter.com

至於到後場,兩個失波都各有責任,第一球輸既十二碼其實哩個判罰值得商榷,艾斯派古達哩個侵犯構唔構成十二碼,小弟認為係有轉彎既餘地,至於第二球明顯係右翼衛既摩西斯未能及時回防,喺缺乏多一重既保護下,令到艾斯派古達與對手形成單對單防守導致出現失球,而後段時間干地換入魯迪加為右後衛,將摩西斯調動到左邊,而將艾斯派古達放番去右邊路,明顯地喺哩個調動後球隊既右路無論係攻守方面都變得穏定落黎,但係暫時未睇到魯迪加所擁有精湛既長傳技能,可能因為仲有大衛雷斯在旁,一切以安全為先,交波都未見過於大膽。
.圖片來源 : Football.London

連續兩場敗仗,令不少球迷開始有聲音,轉陣、改變踢法、球員擺位、臨場調動等等,更過份悲觀認為來季成績不佳而辭退干地。理性討論,在於人腳所限,干地的確以不變應萬,在陣式不變既情況下配置出合適既人手,會比重新鍛鍊一個新陣式為佳,而且季前熱身賽既主要目的係提升球員狀態,同時加強舊球員及新加盟球員既融合性,以及及早發現球隊不足之處再作調整或加以補強。而干地亦有喺賽後表示並未有太多選擇之下同時派出巴舒亞伊以及莫拉達,明顯比說話球會聽需要在引援進度上再加快進度。
.圖片來源 : Nu

被留在倫敦既馬迪轉投到摩連奴手中亦只係時間問題,喺車路士至今既四個收購當中,曼城免費來投既卡巴尼路頂替比高域、羅馬既魯迪加頂替前隊長泰利、摩納哥既巴卡約高頂替即將離隊既馬迪、而莫拉達係頂替與干地鬧翻既迪亞高哥斯達,還未計上季季前同季中離隊既奧斯卡、米基爾、伊雲奴域,以及一眾年青小將外借或離開,車路士在人腳基本上未算稱得上為補強,至少人數上絕對不足以應付來季四線作賽。
.圖片來源 : Foot Mercato

而喺幾場季前熱身賽當中,對陣既對手巧合地都有一啲被傳收購既潛在目標喺度,包括阿仙奴既張伯倫、拜仁慕尼黑既連拿度山齊士同國際米蘭既簡達華,仲有一直同祖雲達斯拉鋸既阿歷士辛度,後者與張伯倫相信會兩擇其一,當然巴西人會係翼衛中既首選,而張伯倫既多位置特質以及英人身份都係吸引之處,至於中場方面如果外借得到山齊士會更好,始終球隊已經有三位正選中場球員,同時間收購第四位而且更要具備相當質素係一件困難既事,而愛華頓既巴克里亦有傳與藍軍拉上關係,但相信只係比拖肥作抬價賣去熱刺之用,至於邊路球員簡達華既年紀亦係球迷關注既地方,別忘記球隊本身已經有夏薩特、柏度及韋利安三位邊路攻擊球員,而且亦有梅桑達哩位年青小將,不幸既係有球員受傷導致喺哩個位置出現人手短缺既情況,收購現年30歲既簡達華作後備多位置之選亦不失為一個唔錯既方案。
.圖片來源 : post img

下星期將會有對陣阿仙奴既社區盾賽事,車路士至今只進行左四場熱身賽,有消息指出球隊會與在倫敦季前集訓既衛星球會維迪斯再進行多一場閉門友誼賽,而且干地在新加坡集訓時其中一節訓練要求傳媒離開,指出目的係為訓練新戰術。由此可見哩位意大利主帥已經清楚明白球隊喺343陣式當中已經接近窮途末路,一成不變亦唔係佢既風格,演練新既陣式作來季多線作戰絕對是有需要的。

再有新消息或收購會再同大家跟進,待續...

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  干地  國際米蘭  

留言

會員
我要評論
請按此登錄後留言。未成為會員? 立即註冊
  • Alex Then
    Alex Then 於 01/08/2017 評論 NO. 1

    热身赛参考价值唔大,車仔一向唔差 利申:曼迷

  • Wayne Chow
    Wayne Chow 於 01/08/2017 評論 NO. 2

    其實打得唔差,有無人夠種車身家買國米攞意甲?

  • Winson Siu
    Winson Siu 於 01/08/2017 評論 NO. 3

    等緊希sir上任,多得班膠層

    利申:轟

  • Kenny Kc
    Kenny Kc 於 01/08/2017 評論 NO. 4

    有又點 冇又點?XDD

  • Tony Tong- Luc Luc
    Tony Tong- Luc Luc 於 01/08/2017 評論 NO. 5

    Chiu Yu Hei Ernest old jor alot

  • 葉家灝
    葉家灝 於 01/08/2017 評論 NO. 6

    好明顯唔夠後備打四線,買2個中場同1個前鋒,1個左後衛就差唔多

  • Ho So
    Ho So 於 01/08/2017 評論 NO. 7

    後面果句睇左做球隊與干地正式解除合約🤦🏻‍♂️

快捷鍵:←
快捷鍵:→