《賽後分析》352付諸實行 車路士怒炒西布朗

BluexLion車迷手記 於 19/11/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

經歷達兩星期的國際賽事後,車路士需遠赴到山楂球場作客挑戰西布朗,以一場大勝了結比賽,可算是為黎緊兩場同樣作客既賽事打下了強心針,包括阿塞拜疆球隊卡拉巴克以及到晏菲路挑戰利物浦,亦見得到干地今季實行既352開始慢慢成形。
.圖片來源 : Chelsea FC

今場正選陣容與上場聯賽對陣曼聯時相同,或許干地為左保持穩定性繼續以勝利十一人出戰,後場繼續由基斯甸臣作中堅中代替大衛雷斯出戰,相信後者會喺黎緊作客卡拉巴克既賽事中復出,左右翼衛分別係馬高斯阿朗素以及薩柏哥斯達,而三中場繼續由法比加斯作發板,簡迪及巴卡約高覆蓋全場走動,至於前線亦係莫拉達搭夏薩特,相信球迷對以上陣容唔會陌生。
.圖片來源 : Metro

其實由上季季尾至今一直都見到原用陣式343存在左唔少問題,盡管球員既執行力有幾強都好,都已經比英超大部份對手看破,而干地都有意思為球隊作出變化,只係因為早前傷員過多,中後場位置球員斷斷續續傷出引致陣式及戰術安排上受到限制。而近期球員們開始陸續復出,球隊中暫時只有三名傷兵,包括剛剛國際賽週受傷既巴舒亞伊、梅桑達以及摩西斯,後者相信可以在下週復出。
.圖片來源 : Daily Star

講番今場波先,西布朗同樣以352應戰,同時囤重兵於中後場區域,希望阻止車路士來犯。上半場早段以一球越位球攻破古圖爾斯大門,相信嚇壞了唔少藍軍球迷既心靈,及後車路士開始掌握得到節奏,不斷透過中路嘗試打開缺口,結果喺17分鐘夏薩特禁區外遠射遭科士打救出不遠,莫拉達「執雞」補射先開記錄。一波未平一波又起,去到23分鐘法比加斯由後場發炮交到莫拉達腳下,西班牙人好似同夏薩特心有靈犀咁後腳一交,後者輕鬆破網,短短唔夠10分鐘內已經攻入兩球。
.圖片來源 : Express & Star

西布朗球員只能繼續以犯規阻止藍軍既攻勢,38分鐘莫拉達博到一個左路禁區邊罰球,法比加斯將球開到遠柱,基斯甸臣受到對手阻攔攻門失敗,但在右路竟然還有伏兵,馬高斯阿朗素左腳窩利一抽,讓車路士帶著3球優勢進入更衣室。上半場其實仲有唔少埋門機會落入左喺巴卡約高身上,不過佢真係要用多啲時間練好埋門起腳方面,好多時搶到波跑到去禁區頂但處理果腳實在不堪入目。
.圖片來源 : We Ain't Got No History

去到下半場,西布朗比到車路士既壓力並無遞增,引致到加利卡希爾同艾斯派古達可以多次走到中前場支援,去到64分鐘又係由法比加斯後場長傳,夏薩特接應後以一敵三射入死角,亦係佢個人今場第二球。干地同時開始準備換人,始終球隊要為黎緊兩場作客賽事舟車勞頓,必需在體力流放下做好控制,先由真禾達入替法比加斯,再換入柏度取代夏薩特,最後由韋利安入替簡迪將陣式變回343。
.圖片來源 : We Ain't Got No History

保持優勢下直到85分鐘,基斯甸臣與艾斯派古達一次誤會差點製造失波,幸好麥基射斜否則難保清白之身。以一場大勝換黎三分在士氣上有一定提升,今場後備既球員相信會喺下場作客卡拉巴克既歐聯賽事中上陣,最重要既係黎緊至少唔好再有傷兵,喺現有陣容既完整性底下希望能夠保持連勝。

Come On Chelsea!

文章最後更新時間 : 19/11/2017 10:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  干地  西布朗  

留言


請按此登錄後留言。未成為會員? 立即註冊
  • Wai Kei Chan 於 20/11/2017 評論 NO. 1

    中場中仲有飲水哥,作後備輪換,佢助攻助守又可長傳遠射

快捷鍵:←
快捷鍵:→