《當日新星變成今日遺憾 為何蘇馬始終都無法在史丹福橋佔一席位?》

藍獅 於 09/09/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


雖然觀迪最終都無法加盟車路士,不過喺藍軍效力長達七年既蘇馬就正式離開史丹福橋轉投至另一支倫敦球會韋斯咸,當日出道時一度被評為未來明日之星,可惜經歷一次嚴重傷患後令職業生涯停滯不前,直到近哩兩季先開始重拾狀態,但成長既時間經已逝去無法追回,定形後既蘇馬究竟因為啲咩原因而令佢始終都無法喺藍軍企穩陣腳佔一席位?今次一齊同大家探討一下...

當時蘇馬係由摩連奴一手提拔出黎,哩名法國新星可以話喺果時既防線擁有泰利、伊雲奴域同加利卡希爾底下填補缺少既速度同活力,睇落身形相當健碩既蘇馬唔好睇佢「大大份」,跑起上黎既速度喺後衛黎講其實都算幾快,而且對抗性亦都唔差,好多時啲一對一爭頂都唔會輸蝕,可以話完完全全係速度同力量既混合體,加上出腳剷波時機得宜唔會拖泥帶水以及擁有良好既傳球視野,能夠準確地將個波通過長傳運送到比前線隊友,基本上無論喺攻或守兩方面都相當出眾平均,再加上有泰利哩個老大哥喺旁邊,就算犯錯都有人包底,令蘇馬做既決定可以更加大膽。

可惜時也命也,正當以為職業生涯平步青雲既時候一次疏忽大意既落地動作,不單止重創左蘇馬既十字韌帶,更可以話改寫左佢既職業生涯,缺陣左接近一個球季既時間之後,車路士將佢先後外借到史篤城及愛華頓,除左希望佢能夠重拾狀態之外,更重要既係要喺穩定既上陣時間下繼續適應英超既節奏,不過法國人所交出既質素都較為平庸,經已無左喺重傷之前既耀眼表現。

直到前一個球季林伯特上任後,蘇馬至正式得到留隊機會,雖然球隊喺戰術配合之下防守未算稱得上相當穩健,不過當時佢伙拍魯迪加可以話係做到相當唔錯既組合效果,但自杜曹上任後,喺回復三中堅體系下蘇馬既位置就變得相當雞肋,杜曹偏向選用表現相對穩健既基斯甸臣或老將泰亞高施華,伙拍艾斯派古達以及魯迪加,而法國人就被淪為最後選擇,什至喺今季開季初段更比青訓小將查路巴爬埋頭。

由戰術角度黎睇,蘇馬喺用波能力方面的確相當切合新一代主帥既口味,但如果用佢黎同基斯甸臣作直接比較的話,法國人喺集中力方面就相當之唔理想,總會喺一場九十分鐘既賽事之中出現一次漏頂既情況,而形式上亦大同小異,一係跳頂時機唔岩,一係就企錯位,而每次犯錯後亦會造成危險鏡頭出現,亦總有一次會係失波而鑄成大錯,再加上蘇馬喺靈活性方面始終都不及基斯甸臣,而後者喺杜曹上任後亦加強左喺身體對抗下既自身力量,令蘇馬完全被比下去。

選擇放棄蘇馬可以話係環境條件上既無奈,始終佢喺球商無乜太大進步底下實在難以打入杜曹既陣容之中,管理層選擇哩個時候套理實在無可厚非,而喺釋出空間後加上未有新中堅加盟,相信小將查路巴喺上半季會得到更多時間發揮。

祝願蘇馬喺韋斯咸發展一切順利,他日場上再見...


文章發表時間 : 09/09/2021 13:00
文章最後更新時間 : 09/09/2021 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  蘇馬  杜曹  韋斯咸  

留言


請按此登錄後留言。未成為會員? 立即註冊
    快捷鍵:←
    快捷鍵:→