《當日只視青訓如生意 今日終於修成正果?》

藍獅 於 10/04/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


仲記得上年差唔多時間打左篇講關於車路士青訓既文章- 《或許 車路士只當年青球員是一盤生意》,當時其實引起到唔少藍軍球迷既共鳴,普遍都認為哩班年青球員都只係球會賺錢既工具,加工之後最終都只會變賣收場。不過經歷短短一年既時間再望番依加車路士一隊既陣容,路夫斯捷克、奧岱都經已晉身於常規陣容當中,似乎球會喺年青球員既取向上有些微變化。

上季可以話多得時任主帥干地,至可以將基斯甸臣回收護送到一隊之中,同時加上意大利人同大衛雷斯交惡,造就左基斯甸臣上位既機會,叫做起碼繼泰利之後終於有一名青訓球員存在於一隊名單入面,其實當時基斯甸臣不乏買家,至少借左佢兩季既慕遜加柏一早都想將佢收歸旗下,無干地既堅持分分鐘都已經賣左出去。今季沙利上任後可以話照辦煮碗,同樣回收上季借左去水晶宮修練既路夫斯捷克返黎,而同時奧岱亦借助與拜仁之間既炒作後來居上,青訓球員可以話靜靜地起革命。

當然,從來都話自家青訓要上一隊都好困難,尤其係生存於傳統勁旅列強之中就更加可以話難上加難,即使你具備優厚既天資同潛力,亦都要等待所謂既「機會」來臨,無人答到你哩個「機會」會係幾時黎到,但係黎左之後仲要睇你把唔把握到,好多球員可能等唔到就選擇離開,就好似前季選擇離開既蘇蘭基咁,當時喺車路士苦無機會,最終唔肯同藍軍續約選擇轉投比起車路士更難比到機會佢既利物浦,唔敢話佢如果當時選擇留低的話今日能唔能夠發光發亮,但至少果時應轉投或外借去一啲中下游球隊成長較為合適,佢既例子可以話係喺職場規劃作出錯誤決定。

而路夫斯捷克近日都有指出,佢同奧岱入到常規陣容之中其實係一個好好既信號,去話比依加藍軍年青梯隊既球員聽只要具備實力,球隊都會比到機會你嘗試喺一隊發展,外借係一個過程,係一個比年輕球員更多機會成長既過程,總算係喺感覺上好似漫無目的既外借之中帶給你一點希望。不過如果以修成正果而論,一切未免都太早下定論,始終路夫斯捷克、奧岱佢兩個依加都先係第一季留隊,未來既主帥會改變,球會方針亦會改變,一切仲存在變數喺度,必需要繼續努力成長,否則最終都只會離隊收場。


文章最後更新時間 : 10/4/2019 17:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→