《由年度最佳球員變成今日平平無奇 基斯甸臣由始至終只係名過其實? (上)》

BluexLion車迷手記 於 24/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


基斯甸臣於丹麥班霸邦比出道時一直都係唔少豪門既收購目標,當時除左車路士之外拜仁同阿仙奴都想將哩位潛質中堅收歸旗下,最終丹麥人選擇投奔史丹福橋,但自借去德甲果兩季表現亮眼之外,基斯甸臣喺車路士既生涯感覺上已經開始停滯不前,究竟係當日雷聲大雨點小,還是球員根本唔適合英超賽場?可以探討一下....

基斯甸臣同佢父親一樣於邦比出道,經歷過8年既成長後於14歲就轉投車路士加入藍軍青訓體系之中,喺應屆相同年齡層既隊友之中有蘇蘭基、艾巴咸、路夫斯捷克等人,依加望番轉頭睇,其實哩屆既青訓質素可以話相當之高。直到球員18歲果時,車路士決定將基斯甸臣送到德國,同慕遜加柏達成外借協議,希望丹麥人能夠喺合適環境以及保持一定既競爭壓力機會底下一步步成長。

結果基斯甸臣成為慕遜加柏應屆賽季最佳球員,球員喺德甲發揮相當得宜,亦令外界對佢既前境亦抱有一定希望,當時慕遜加柏其實係有意將基斯甸臣買斷,有向車路士提出正式報價,但遭到藍軍拒絕。經歷兩季既借用期,基斯甸臣喺累積唔少經驗後重返藍橋,而主帥亦由當日離開時既摩連奴變為干地,意大利人季前經已向外界表示哩位後防既青訓產品會係球隊未來既寶貴資產,無論任何列強出價球會亦不應該作出出售決定。

而基斯甸臣可以話係「出租車」之中第一位可以回歸一隊效力既年輕球員,無疑能夠為青訓梯隊球員釋出一個正面信息,只要達到一定程度既進步以及提升,車路士定必會唯才是用,再加上當時干地亦有給予年青球員一定上陣時間,能夠善用自家青訓資源對球會黎講絕對係無往而不利。
不過由上季沙利到今季既林伯特,並唔係比好多上陣機會基斯甸臣,係去到季中一度傳出AC米蘭有意提出收購,獲林伯特留任後至開始得到多番啲時間上場,但其實由外借回歸藍橋後基斯甸臣既表現一直都唔突出。首先佢喺身體對抗上係絕無任何優勢,只要係比對手刻意埋身碰撞的話基本上一撞就跌,被唔少球迷揶揄為「丹麥女孩」,而喺組合上無論佢係伙拍魯迪加還是蘇馬定湯姆利,感覺上佢都好似格格不入,我行我素咁,發揮唔到所謂「一對」中堅互補既化學作用...

下集將會更詳細講下基斯甸臣喺球員特質上既利弊,以至佢究竟仲應唔應該留喺史丹福橋,下回待續...


文章發表時間 : 24/03/2019 11:25
文章最後更新時間 : 24/03/2019 11:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  基斯甸臣  

留言


請按此登錄後留言。未成為會員? 立即註冊
    快捷鍵:←
    快捷鍵:→