《用波能力就只係一塊「遮醜布」 - 大衛雷斯》

BluexLion車迷手記 於 27/08/2018 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : 90Min.in

英超開季黎到第三個星期,而車路士亦完成左三場賽事,沉晚驚險地聖詹姆斯公園球場全取三分,相信唔少車路士球迷對於哩場賽事既進程都相當心驚膽跳,由本身一分到三分,再由三分變為一分,最終含著少許幸運成份地全取三分。要不是大衛雷斯果下唔專心,其實咁驚險既情況就唔會發生,哩三場波都睇到雷斯存在唔少失誤,沙利仲係咪應該繼續對佢委以重任?

上季大衛雷斯經歷左一個非常多傷病既一季,加上與時任主帥干地意見不合,即使健康時亦一度被冷藏於後備席上,更有傳佢同韋利安會喺完季時被賣走。令人意外既係,最後走既竟然唔係佢兩個而係干地本人,令大衛斯留隊機會出現轉機,而喺季前熱身賽都睇到,即使沙利將球隊慣常陣式由三後衛改回四後衛,亦依然保留大衛雷斯為正選,將隊長加利卡希爾以及基斯甸臣都掟到冷板凳上。

而喺上季大衛雷斯缺陣既好幾場波我地睇得到,雖然後防整體表現好似穩定左,但係喺配合進攻方面似乎缺少左助攻方面既元素,講緊既唔係前插,而係後場長傳方面,直接將皮球透過由後防快速送到前線作攻勢,哩招其實行之有效,只需三四腳波就能進入對手心臟地帶。現有既後防人選方面,暫時只見得到魯迪加係有相當唔錯既長傳視野及質素,但由於當時干地亦比較少用德國人為正選,引致過份依賴法比加斯為策動攻擊重心,減少左球隊既進攻板斧。

但睇返近哩幾場波,似乎所謂既用波能力都就只係雷斯所用黎掩蓋防守失誤既「遮醜布」,就等同沙治奧拉莫斯利用頭槌入球數字去掩飾自己防守力不足一樣。突然「大腦短路」、缺乏長期集中力、事不關己既態度面容,如果雷斯繼續唔改善上述不足的話,同樣既失波就只會陸續有來。

文章最後更新時間 : 27/8/2018 16:15


來源 : Goal.com

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  沙利  干地  大衛雷斯  紐卡素  

留言


請按此登錄後留言。未成為會員? 立即註冊
  • Borman Chan 於 28/08/2018 評論 NO. 1

    十分之認同沙莫狗果句👍👍👍

快捷鍵:←
快捷鍵:→