《沙利大限將至 摩連奴三次執掌?施丹強勢掌權?》

藍獅 於 20/02/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : FC Naija

摩連奴三次執掌?施丹強勢掌權?相信唔少球迷對於沙利嘅耐性都已經到左盡頭,就連英國當地球迷都要「Fxxk Sarri」,亦正好係傳媒炒作新領隊人選嘅機會,既然係一啲吹水新聞就不彷吹下對兩位人選嘅睇法。

先講摩連奴?「不了」二字經已答案,唔好講話咩植入藍色基因、流著藍色的血,由佢第二次離開車路士果一刻經已代表佢同藍軍係要各行各路,再者佢離開後第一時間選擇執教曼聯,經已不能再走回頭路。由賽前安排到臨場調動,再到同球員之間嘅溝通,都睇得出摩連奴經已將自己迫入「走火入魔」嘅地步。過往出口術保護球員,依加變成喺球員之中搵箭靶,推卸自己喺戰術上嘅失誤,而「泊大巴」嘅成功亦驅使佢喺戰術思維上缺乏新意,再者一連串嘅工兵化,馬達、迪布尼等技術型球員身受其害,恕難以再接受多次打擊。

如果身為車路士球迷嘅你仍然對佢有著美好光境想佢三次回歸,麻煩你搵埋當日仲當打嘅杜奧巴、林伯特、泰利等師兄弟歸位。否則,建議你唔好再發夢。

至於施丹,正所謂皇帝女唔憂嫁,就憑人地份CV有三隻大耳朵盃哩一項,就知成件事根本無可能,完全諗唔到車路士有咩可以吸引到佢黎執教嘅地方,係就連一項都無呀。就算施丹想黎英超挑戰下,都唔會搵依加哩隊車路士啦,錢又唔夠人多,轉會權又無,仲要睇球員同高層面色,仲要未計成績一有咩閃失就要受傳媒施壓,相信大家知啲英國傳媒針對嘅炒作幾利害架啦,何必黎打爛自己金漆招牌,佢倒不如等艾歷尼唔玩祖雲達斯果陣接任好過啦

老實說,其實無論炒唔炒沙利都好,都唔好再比Marina(瑪蓮娜)干涉轉會操作先係最重要,搵個管開數嘅外行人黎搞轉會操作,根本唔會知一個球員真正嘅價值係咩,淨係識好似師奶仔街市買餸咁討價還價,做靚盤數。當然,並唔係話前任總監Emealo(艾文拿路)喺哩方面做得好,只係至少佢做到領隊同Marina(瑪蓮娜)之間嘅夾心,亦就係杜文澤喺低俗喜劇所講「果一撮陰毛」 嘅角色,哩個位置喺車路士黎講係極為重要,一日無哩個人一日都只會權力失衡。

當然,你可能會話Marina(瑪蓮娜)幫沙利搵佐真奴同希古恩返黎都算係咁啦,但麻煩你諗清楚,如果唔係Marina(瑪蓮娜)干涉轉會操作拖住球會後腿,會有咁多好教練死喺車路士手上?當中究竟洗左幾多冤枉錢係有喺盤數入面反映出黎?

近哩幾年嘅車路士究竟係向上游定走緊下坡,相信心水清嘅球迷會睇得透。


文章最後更新時間 : 20/02/2019 13:15


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/


如果喜歡我們的文章,請即分享到︰

標籤: 車路士  沙利  摩連奴  施丹  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→