《有一種昇華 叫棄巴卡約高換高華錫》

BluexLion車迷手記 於 16/08/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Sporting News

不出所料,即使英超轉會窗完結,亦無阻中場人手過剩既車路士「瘦身」,將巴卡約高外借至意甲AC米蘭,而外借合約中更加入買斷條款,意味著法國人短期內都唔會喺沙利既戰術體系中有生存空間,與此同時藍軍喺皇家馬德里借入高華鍚,相信今個轉窗既補強無論對沙利或者各位車路士球迷黎講都達到合格什至滿意水平。

單單加盟一季,巴卡約高既表現可以話係由天堂跌落地獄,加盟前曾經以為佢能夠取代到馬迪既職責,無諗過連一啲球員既基本控傳都未做得到,干地所用既343陣式之中雙中場責任亦唔少,再加上球員明顯對英超既節奏以及裁判既執法標準依然唔熟悉,出腳時機不當經常被吹罰,自從喺聯賽拎左第一面紅牌後就被干地打入「冷宮」,而即使復出後亦顯得信心不足,表現平平,喺干地既戰術體系下巴卡約高都只係得到少有既機會,就更加唔好講著重中場連貫性既沙利。

唔能夠否認巴卡約高係有潛力,但喺依加哩個階段真係連「周身刀」都未有,就連話佢「冇張利」既機會都冇,既然仲未成熟的話外借修煉都未尚唔係一個好辦法。反觀高華錫係一個相當之恰當既補充,克羅地亞人作為車路士放古圖爾斯到皇馬既條件之一,以借將身份到史丹福橋效力一季,無論實力同表現,高華錫都係國際舞台上展現到出黎,不容置疑。

擁有強悍既護波能力以及身體對抗性,實而不華既突破,同時能夠控球在腳推進好一段距離,加上果斷既攔截同出色既預判能力,以及喺皇馬同克羅地亞國家隊都經已証明自己身價,可以話無論邊方面既能力同質素都比巴卡約高優勝。如果用佢夾埋簡迪同佐真奴真係能夠產生化學作用的話,絕對能夠為球隊既中軸線帶黎攻守平衡、廣闊既覆蓋面積同埋強大活力流動性,比起過去幾季既車路士中場黎講可以話提升左至少一個檔次。

不過眼見唔少球迷對於外借高華錫既合約當中無買斷條款表示不滿,認為同「幫人練兵」無分別,老實說,以車路士今季未有出戰歐聯資格做大前題下,要吸引到一個乎合沙利戰術理念而且具備質素既中場其實並唔係一件容易既事。再大膽假設如果高華錫本人喺藍軍踢得出表現亦成功爭取到長期正選,唔排除球員甘願留低又或者球會即使無買斷條款下亦會作出收購,所以依加點睇哩單交易對車路士都唔係一件壞事,大家無需要針對哩一點而覺得哩單交易係蝕。

棄巴卡約高換高華錫,對中場黎講絕對係一種昇華。

文章最後更新時間 : 16/08/2018 12:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→