“我還欠缺什麼” - 巴舒亞伊

BluexLion車迷手記 於 23/08/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

上季季尾對陣屈福特時,一個人入左球「奪冠波」,成為球隊提早兩輪奪得英起冠軍既「贏波功臣」,被認為在藍橋生涯前途無可限量;到今季啱啱對陣熱刺既作客賽事上,一個人入左球「老烏」,要不是馬高斯阿朗素獨力殺入禁區施射,哩個人就會背上「失分罪人」之名。一季之間,其實無一季只係一個季尾一個季初,已經係天堂與地獄既交替,哩位主角叫巴舒亞伊。
.圖片來源 : Klix.ba

回想起上一季,隻身由法甲加盟藍橋,相信當時無乜球迷會認識佢,只係知道一名比利時新星背著4000萬歐元既身價來投。車路士沒有留下外借既柏圖,而雷米亦傷多過踢,只淨下一個迪亞高哥斯達實在唔夠用,但寥然喺法甲用一個高價收購一個潛力新星,無論喺球員自身既壓力上或球隊需要承受既風險都唔低,至今哩單交易值唔值就見仁見智,但球員亦需要要時間繼續証明自己身價。
.圖片來源 : YNaija

當然,要喺藍橋做到正選射手並唔係咁易,繼傳奇杜奧巴後,無論費蘭度托利斯、或是伊度奧、丹巴巴亞都未能為車路士既前鋒線上提供穩定既入球數字,而帶著法甲17個入球同9次助攻既巴舒亞伊黎到,就係希望接受新挑戰。可惜,佢既直接競爭對手,係一加盟球隊就無需適應「即插即用」既迪亞高哥斯達,而干地亦新手上路,繼續維持單前鋒陣式,巴舒亞伊上陣機會實在唔多。
.圖片來源 : 101 Great Goals

巴舒亞伊喺車路士既第一季,在各項賽事上陣29場,但其中只有8場正選,總上陣時間得792分鐘,一共取得11個入球3個助攻,數值上似乎喺有限既時間都好有入球效率,但喺果11個入波當中其實有6個入球係喺本土盃賽或U23賽事中對住低組別球隊所入的。而睇番聯賽方面既入球,喺佢為車路士上陣既第二場中,其實已經後備上陣為球隊追和並以1-2反勝屈福特,當時曾經令球迷憧憬過一段時間,並且覺得巴舒亞伊理應得到更多上陣時間。
.圖片來源 : The Sun

上季曾經會問為何干地一直都只安排巴舒亞伊後備上陣?其實今季球員既表現已經為意大利人解答左哩條問題,先睇番球員特性,擁有一身優厚既身體質素既巴舒亞伊,無論彈跳力同速度都唔係大問題,最大既問題反而係走位同First Touch方面,尤其係車路士係一支向來倚重雙翼進攻既戰術體系既球隊,接高波後再分邊進行配合攻門,又或者背著龍門直接抽身起腳,以完成一次進攻。
.圖片來源 : Sportslens.com

而巴舒亞伊喺哩方面仲有好大既進步空間,同時佢喺車路士好需要一啲技術性強既球員去配合佢,所以見到如果佢配搭上依加既韋利安可以話死哂火,反而如果伙拍柏度既發揮會較好,仲有未傷癒復出既夏薩特。至於走位方面,就真係要時間去練同建立默契,咩時候應該企咩位去配合進攻,咩時候應該墮後拎波,如果佢真係有心想長留藍橋佔一席位,就一定要花心機喺哩幾方面多加鍛鍊。
.圖片來源 : Metro

喺啱岩對熱刺既「老烏」入球後,唔少唔理性既球迷又或者過份「火遮眼」要求佢離開車路士,亦有報導指出法甲里爾會喺轉會窗結束前提出收購,將哩位比利時新星帶番去熟悉既法國聯賽。如果球會選擇放人的話其實十分不智,首先直到目前為止車路士只有三名前鋒,而其中雷米只因傷患未能離開球隊,喺今季需要應乎多條戰線之下以莫拉達一人絕對不足夠應付,有誰能確保球員一季無傷無病?
.圖片來源 : Football.London

另外,一支球隊至基本都需要擁有兩種唔同特質既前鋒,至少無論喺教練戰術調動既靈活性或是臨場安排既變換都絕對有幫助,正好巴舒亞伊同莫拉達一剛一柔。而戰術上其實比利時人未能過份適應得到喺英超擔任單箭頭,尤其實對住一啲中上游球隊對手下下埋身迫搶既時候,見到好多時隊友傳波比佢,巴舒亞伊多數轉身就甩或者比人拍甩個波,反而干地有冇機會比佢打雙箭頭,驅使對手唔能夠過份集中喺佢身上而且分散注意力,為巴舒亞伊製造多啲空間進行入攝或者射門,效果或者會更加理想。
.圖片來源 : mogaz news en

年青人需要多啲機會至能夠成長,而明顯巴舒亞伊並唔能夠把握得到迪亞高哥斯達離開既契機,究竟繼續喺後備席等待上陣機會還是離開,就好睇佢自己同埋干地會唔會為佢製造哩個成長機會,相信球迷亦唔希望「盧卡古事件」再次發生。

文章最後更新時間 : 23/08/2017 09:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

標籤: 巴舒亞伊  車路士  干地  

留言


請按此登錄後留言。未成為會員? 立即註冊
  • yamato2008 於 24/08/2017 評論 NO. 1

    他改錯了名字,叫包輸阿姨,一開咧便入自己波,失䀆人心~~!

快捷鍵:←
快捷鍵:→