《容易受傷的男人 - 路夫斯捷克》

BluexLion車迷手記 於 20/03/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


對上一篇關於路夫斯捷克嘅文章都經已數到上年十月嘅事,當時仲怕佢會因為得唔到上陣機會而再一次以外借身份離開史丹福橋,而事隔五個月後包括經歷埋冬季轉會窗,路夫斯捷克不單止無離到隊,更重要嘅係成功喺正選與後備之間搶到一席位,其實佢的確具備打正選嘅質素,但始終敵不過球員嘅最大敵人,傷患...

路夫斯捷克8歲加入車路士青訓體系,望住對上一個能夠由青年軍打到上一隊仲做埋正選,成為一個真真正正嘅「藍血人」就只係得泰利一個,而「龍虎切」亦心明哩個道理,只好一直等待機會嘅來臨,直到摩連奴二次回歸史丹福橋後,路夫斯捷克終於得到第一個為一隊上陣嘅機會。老實講係人都知摩連奴並唔係一個善用青訓資源嘅領隊,但由於當時車路士中場人手捉襟見肘,就算係迫於無奈都一定要提拔青年軍上嚟,亦因為咁造就咗路夫斯捷克嘅出現。

當時佢嘅位置為中場中,主要擔任法比加斯嘅替補,之後干地執教時嘗試將路夫斯捷克定位為翼鋒(影子前鋒),效果又出奇地有驚喜,英格蘭人身材高大得嚟喺推進方面嘅速度唔慢,加上控球能力不俗,而且能夠利用個人技術一個過幾個,位置上嘅多面性的確能夠令佢獲得更多嘅上陣時間。與此同時,外借到水晶宮嘅時間亦有機會睇到路夫斯捷克具備立足於英超嘅能力,至少依加真係無乜後生仔肯同你付出時間外借到英超中下游去証明自己,多數都係一嚟就呻要正選,無的話二話不說就要走,所以哩點絕對值得欣賞。

而今季喺沙利手下,路夫斯捷克都總算得到唔少上陣時間,但如果唔係佢嘅背傷一直斷斷續續未能根治,相信「龍虎切」所得到嘅機會什至會比巴克利多,其實喺沙利嘅戰術體系再加上近期狀態,路夫斯捷克能力上會比巴克利全面,理應前者先係正選,而兩者近日亦同時入選修夫基新一輪英格蘭大軍名單,但路夫斯捷克最終都因為傷患而決定退選。球員近日亦有表示自己嘗試利用瑜伽改善背傷問題,總算自己都希望能夠根治有關傷患。

容易受傷的男人,實在唔想再見到有球員因為傷患而耽誤前程。


文章最後更新時間 : 20/3/2019 15:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→