《大話當年 由費托說起 細數由藍轉紅 紅轉藍的五大球星》

藍獅 於 13/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

近日回顧唔少曾效力過車路士既球員,當中發現利物浦同藍軍近年黎都有唔少球員互換當家,有唔少更令球迷意想不到,精選左其中五位球員同大家回顧一下...

費蘭度托利斯
由 利物浦 轉至 車路士
相信費蘭度托利斯係六位之中最觸目既一位,當年冬季轉會窗以破轉會費紀錄被車路士收購,但佢喺史丹福橋渡過既日子並唔易過,哩位西班牙前鋒一直未有交出乎合球迷預期既表現,而入球數字遠遠比起喺晏菲路效力時為低,被外界公認為「水貨」。雖然喺車路士生涯分別獲得歐冠同歐霸奬盃,不過球員其亦後直言喺利物浦時期正直自己高鋒,而喺車路士既時候自己咩都唔係,顯然地藍軍只能為佢帶黎奬盃榮譽,但過得一啲都唔快樂,而之後亦外借過去AC米蘭以及回歸母會馬德里體育效力,職業生涯尾站選擇加盟日職鳥栖砂岩,亦喺早前時間宣佈退役。

祖高爾
由 車路士 轉至 利物浦
相信無人會未聽過佢個名,出道自韋斯咸青年軍既祖高爾,喺一名盤球同射術都相當了得既一名翼鋒球員,喺車路士效力時期可以話將佢既球員生涯推至高峰,協助球隊衝擊各項錦標,但喺藍橋效力生涯尾期開始受到傷患困擾後,狀態亦大不如前,亦漸漸失去正選之位,最終選擇完成合約離開效力過7年既車路士,以免簽姿態加盟利物浦。但傷患並沒有離開過祖高爾,同時身型已經唔能夠回復到最高峰果時咁好,體力亦不足以應乎一場90分鐘既賽事,喺利物浦既生涯亦過得不如意之下,外借到法甲里爾,再重回舊地回到母會韋斯咸,及後效力較低組別聯賽球隊漫漫淡出主流球迷既目光,亦喺2018年宣告退役,現時於車路士任職U18及預備組教練。

班拿約
由 利物浦 轉至 車路士
班拿約可以話係遊走豪門既藝術家,除左效力過哩兩支紅藍球會之外亦曾經組借過去阿仙奴,而哩名以色列國腳絕對係一名好波之人,喺效力利物浦時期經已入左唔少救命波,但無奈地一直未嘗冠軍滋味而轉投車路士,為當時擁有林柏特及艾辛等較剛強既中場入面增加一點技術味道,可惜及後時段大多時間都係以後備上陣,而其後更被馬達、奧斯卡等星味更強既技術性球員取代,而被外借到阿仙奴,班拿約果季既表現非常出色但雲加無意買斷或繼續外借,到番黎藍橋之後果季車路士亦奪得歐霸盃,總算係比佢得一嘗冠軍夢。
相關文章 : 《短暫的十號 遊走豪門的藝術家 - 班拿約》

史杜列治
由 車路士 轉至 利物浦
曼城青訓產品,自轉會到車路士及外借到保頓一季後,一直得到唔少上陣機會,但史度列治希望能夠以中鋒位置上陣,可惜球隊在最前線已經擁有杜奧巴、安歷卡及費蘭度托利斯等正前好手,哩位英格蘭小將只能被安排以翼鋒角色上陣,最終球員選擇離開史丹福橋加盟利物浦,更喺之後與蘇亞雷斯和史達寧合組3S,攻力可以話同依加沙拿、文尼同法明奴旗鼓相當,而喺效力車路士及利物浦期間亦曾贏得歐聯冠軍,可以話史無前例。

美列利斯
由 利物浦 轉至 車路士
一身紋身絕對能勾起你對佢既回憶,當年車路士正直缺乏一名全能中場,喺收購仲係為熱刺效力緊既摩迪失敗後,藍軍唯轉移目標到哩位葡萄牙國腳身上,而球員一心不想離開晏菲路,似乎哩單交易係利物浦有意將佢出售,美列利斯喺轉會後亦好快喺車路士站穩陣腳,同時成為球隊繼林佰特後另一為遠射得分手,更為藍軍贏得歐冠以及足總盃兩座奬盃。可惜既係球隊自奪冠後有意年青化,最終美列利斯選擇離開英超加盟費倫巴治,短短效力一季就結束藍橋生涯。


文章發表時間 : 13/04/2019 11:30
文章最後更新時間 : 13/04/2019 11:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→