《因為英人 所以加盟? - 真禾特》

藍獅 於 26/03/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : ESPN.com

自林伯特、艾殊利高爾、泰利等傳奇相繼離開藍橋後,車路士主力之中就只係淨底加利卡希爾為純英格蘭本土球員,係就係仲有法比加斯、摩西斯同一堆青年球員叫做頂住個本土名額,但球會都需要為英人元素作出補充,所以喺今季季前轉會窗,藍軍喺最後一刻都要同足總申請延長轉會時間,為既就係要從李斯特城帶佢黎史丹福橋,佢就係真禾特。

貴為李斯特城15-16年球季以夢幻式勇奪英超冠軍功臣之一,以果季既重要性黎講真禾特絕不下於簡迪,自後者離開後,「飲水哥」就成為狐狸軍團既第一防中,為防線前提供最後一道保護線,亦因為咁引致到佢無論喺各項賽事既入球同助攻數字上都大大比起「奪冠年」為少。雖則李斯特城喺聯賽同歐聯都唔能夠延續亮眼成績,但真禾特依然保持一貫平穩水準,實在係中場重要一員。

其實自轉會窗起都經已開始傳出車路士會收購真禾特,又開始直到最後真係官宣果刻,加上3500萬鎊既轉會費,外界都一直有聲音指出哩位曼聯青訓未夠班,無可否認,以「飲水哥」既級數黎講真係唔算得上一線,但車路士在缺乏英人下,加上要喺向來普遍名大於實既英格蘭搵番一個具質素既本土球員並唔易,真禾特攔截能力同中場串聯技巧經已算得上中上級,與簡迪之間既默契無需懷疑,加上法比加斯年紀已經唔輕,再唔能夠過份依賴佢去組織攻勢,真禾特既長傳視野絕對能夠喺西班牙人缺陣下對球隊戰術上既影響減到最少。

但真禾特亦都係一個「傷病底」既球員,本身喺李城過黎都係帶住傷,加盟後休養到十月尾先出至首次著起藍色球衣上陣,亦喺對史篤城果場聯賽入左球好靚既世界波,近日又開始同巴克利受番傷,兩位英人同樣係「容易受傷的男人」,導致車路士中場人手再次捉襟見肘。當然,如果真禾特健健康康的話,無疑能夠為巴卡約高等人帶黎競爭,以及為後備席提升一定質素。

因為英人,所以加盟?睇你點睇...


文章最後更新時間 : 26/03/2018 14:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  真禾特  簡迪  李斯特城  

留言

會員
我要評論
請按此登錄後留言。未成為會員? 立即註冊
  • 李斯特城-創造奇蹟的球隊
    李斯特城-創造奇蹟的球隊 於 26/03/2018 評論 NO. 1

    真係唔知點解車路士要買真禾特...

快捷鍵:←
快捷鍵:→