《別忘記他只是穿起詛咒球衣的廿二歳青訓 - 艾巴咸》

藍獅 於 25/08/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


休賽期時間短,馬不停蹄地為各名藍軍青訓球員作賽季回顧,繼美臣蒙特後今次黎到佢既前線拍檔譚美艾巴咸,後者喺車路士球迷心目中既表現同待遇可以話同蒙特有天淵之別,由季初亮眼既數據去到季尾出現被基奧特取而代之既聲音,其實到底又有幾多人知道艾巴咸背負著既壓力有幾大?

自少加入車路士青訓體系既艾巴咸,一直以速度作為賣點成為青年梯隊中既前線新星,亦同時為球隊成為14/15以及15/16兩個球季既U19歐洲青年賽冠軍,及後經歷過布里斯托城、史雲斯以及上季轉到有泰利做助教既阿士東維拉三個球季既外借生涯,今季喺林伯特接掌球隊後終於得到留隊機會,更揀選穿起受詛咒既「9號」球衣,可見得哩名黃毛小子相當具野心希望能夠喺一隊闖出一片天。

而其實今季並非球員本人踏足英超既第一季,喺前年外借史雲斯既時候球隊經已係喺英超作賽,可惜擔任正選中鋒既艾巴咸喺果季39場賽事之中只錄得8個入球,其中就更只有5個係聯賽入球,最終都無法令史雲斯脫離降到英冠既命運,當然除左喺鋒線上之外史雲斯亦有其他問題引致佢地降班,不過喺果季都經已睇到艾巴咸欠缺一項能夠立足於英超既前鋒特性,就係穩定既入球率。

除左速度之外,艾巴咸喺前鋒應有既射門觸角以及技巧方面其實都相當一般,佢的確有魄力能夠喺前場作迫搶,但總喺把握入球機會上欠缺一槌定音之力,而喺狀態上亦比較飄忽不定,當腳風順時可以中龍連入一兩球,但當過左道氣之後就下下「射飛機」,亦同時影響得到佢既心理質素,尤其係喺急於表現自己既情況下既處理埋門既手法就只會顯得更差。

不過如果以今季第二個英超賽季黎睇,其實艾巴咸喺數據上係有明顯既進步,47場既賽事中錄得15個英超以及3個歐聯入球,以一名青訓初哥黎睇能夠喺入球數字獲得雙位數絕對唔容易,林伯特喺開季時嘗試利用佢同蒙特作為球隊既進攻核心,兩者之間輪流爆發亦令藍軍上半賽季錄得一段唔錯既走勢,雖然艾巴咸自接近季尾時段因受傷而狀態回落,其後更被基奧特取代正選之位,但如果針對佢喺聯賽既入球數字黎講,其實有7場波既分數係由艾巴咸既入球而獲得的,想表示既係雖然球員欠缺穩定性,但絕不應該埋沒佢喺今個賽季為球隊最終成績而所付出既功勞。

從來喺球隊擔任關鍵位置有背負著壓力,尤其係前鋒、中堅以及龍門哩三個位置,總因為表現失準或個人失誤而被球迷茅頭直指,雖然季初都認為艾巴咸只具備英冠級數,不過佢交出黎既成績並唔失禮,加上只有廿二歲之齡,不能強求得太多,相信來季喺添姆雲拿等前線好手加盟下艾巴咸能夠喺良性競爭下繼續成長,始終球迷們心底裏都希望能夠成功培育出一名具質素既自家前鋒吧...


文章發表時間 : 25/08/2020 13:05
文章最後更新時間 : 25/08/2020 13:05


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  譚美艾巴咸  艾巴咸  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→