《兩球助攻擊敗利物浦 你仲記唔記得佢?佢叫馬高馬連》

藍獅 於 07/11/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Liverpool FC

歐聯戰線重開,沉晚上演左八場分組賽,其中最受注目必定係貝爾格萊德紅星以爆冷姿態喺主場2-0擊敗左利物浦,令紅軍歐聯作客連敗記錄再添一場,紅星有射手柏夫哥夫梅開二度,不過今集想講嘅主角並唔係佢,而係交出兩球助攻比佢嘅另一位紅星球員,佢叫馬高馬連。

早年成名於雲達不萊梅,當日嘅佢仲係同奧斯爾齊名,合組「不萊梅雙子星」,可以話係德國國內嘅明日之星,亦被外界喻為「德國美斯」,馬高馬連以速度高及盤扭力強見稱,當時嘅影子的確與美斯有幾分相似。年少成名嘅佢同奧斯爾好快得到各大豪門關注,後者選擇轉投皇家馬德里,而馬高馬連亦緊隨其後離開德國尋接受新挑戰,加盟應屆歐聯冠軍車路士。

不過德國人誓都估唔到,哩一刻嘅決定對佢未來嘅足球生涯會有咁大影響,車路士喺奪得歐冠後希望改變球隊風格,一下子收購唔少「技術流」球員,夏薩特、奧斯卡等亦係同馬高馬連同期加盟,但德國人對比其他新球員喺適應英超方面就真係無咁理想,長期於冷板凳上作後備,即使有機會上場都交唔出佢喺雲達不萊梅嘅高水準表現,加上傷患一直斷斷續續未能根治,更一度要落到藍軍U-21作賽。

風格唔適合之下車路士唯有將佢外借,馬高馬連亦就咁開展左佢嘅「人球」生涯,先後外借到西維爾、費倫天拿、安德列治及特拉布宗,但表現一直都浮浮沉沉,亦因為咁無球隊肯喺外借之後出價買斷佢,係直到前季奧林比亞高斯先至向車路士提出正式收購,今季再轉投擁有歐聯資格嘅貝爾格萊德紅星,令到大家仲可以喺國際賽場上一睹哩位曾經係德國天之驕子嘅風采。

今日嘅馬高馬連都只係二十有九,仲未算係黃昏之年,依加只希望佢能夠享受足球,在賽場上繼續留下腳印。

文章最後更新時間 : 07/11/2018 10:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→