《值得信賴的無名英雄 防線上的中流砥柱 - 魯迪加》

BluexLion車迷手記 於 14/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


曾幾何時車路士以鐵血防守而命名,而經歷時代洗禮、改朝換代以及方針改變後,今季藍軍防線經已變得相當脆弱,話雖如此,喺一班較為幼嫩既小將之中林伯特亦保留陣中其中一位值得依靠既當打球員 - 魯迪加,近日傳出德甲雙雄想搵返哩位國家隊要員回歸德國,如果依加既車路士再缺少埋佢的話,後果實在不敢想像...

魯迪加少時加入多蒙特青年軍,而其後轉到德甲老牌球隊史特加正式出道,亦一步步上位成為球隊主力正選球員,而「首都狼」羅馬喺哩個時候出手將德國人帶到意大利,其實車路士一直有留意球員去向,無論係仲喺德甲效力之時還是喺羅馬時期,直到2017年藍軍先正式出手將魯迪加收歸旗下,由於當時球會頭號目標邦路斯(Leonardo Bonucci)拒絕出國效力,而雲迪克(Virgil van Dijk)喺價錢上亦唔合乎藍軍嘅預算,喺文路拉斯(Kostas Manolas)等煙幕下突然爆出收購嘅係其隊友魯迪加,實在令唔少球迷感到意外。

哩位德國中堅同時能夠勝任中堅以及閘位位置,而喺效力羅馬其間亦經常喺三中堅以後四後防陣式之間輪換,所以對於果時較為人陌生既三中堅陣式已經有一定認識,而除左喺身高優勢上之外魯迪加既速度爆發力亦相當之強,跑起上黎既段速甚至拍得上啲翼鋒球員,再加上善於閱讀比賽形勢及有良好視野觀察力,能夠準確地將個波由後場傳到鋒線上,亦好勇於帶球出擊;而喺防守方面,魯迪加亦係一位以穩重為先既中堅,唔會過份冒險應清則清,單防能力方面亦係佢既優點之一,好多時一啲進攻球員單對單對住佢都基本上無乜甜頭可言,就好似魯迪加嘅前羅馬隊友沙拿咁。

而上季伙拍大衛雷斯時魯迪加交出既表現亦都相當亮眼,組合上同巴西人一標一包出現1+1大於2既化學作用,兩者可以話能夠相輔相成,可惜自林伯特上任後季初與前者鬧翻,喺轉會窗完結前選擇離隊轉投同巿球會阿仙奴,亦變相令球隊中較有經驗既球員只留下魯迪加一人,再加上德國人喺季初經歷一段唔短既傷患期,車路士既防線上就只能依靠基斯甸臣、蘇馬以及湯姆利三位小將,而交出既防線表現亦令球迷不堪入目,直到魯迪加復出後車路士既後防表現先有所改善,始終缺乏有經驗球員帶領之下年輕小將實在容易受場上氣氛影響而會有落差,可見得依加魯迪加對於車路士實在非常重要。

而喺國家隊方面魯迪加亦被委以重任,喺謝路美保定(Jerome Boateng)同曉姆斯(Mats Hummels)退下後哩位車路士中堅就要同蘇利(Niklas Süle)成為新一代中堅組合,但魯迪加始終係一名比較多傷既球員,而且每次一傷都要休養一段唔短既時間,哩點無疑無影響左佢能更進一步成為頂級中堅既進程,喺傷患方面實在要多加留意。

如無意外車路士係會開出長約續留魯迪加,繼續留喺英超還時回歸德甲將取決於球員自己既去向,而近日亦傳出藍軍會喺黎緊既轉會窗喺中堅位置上有所動作,相信係為德國人既拍檔而做準備,球迷們亦希望見到一對較為穩健既中堅組合演出,逐步減少「救心」既畫面出現。


文章發表時間 : 14/05/2019 14:00
文章最後更新時間 : 14/05/2019 14:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  魯迪加  

留言


請按此登錄後留言。未成為會員? 立即註冊
    快捷鍵:←
    快捷鍵:→