《三後衛是掩蓋問題還是解決問題? 狼隊對車路士賽後分析》

BluexLion車迷手記 於 15/09/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


令人意外既出場名單,林伯特今場波首次安排以三後衛陣式出戰,有人猜測因為左閘既艾馬臣喺國際賽傷出,起用馬高斯阿朗素所以轉打三後衛,亦有人猜測因為對手狼隊過往都用開三後衛作慣常陣式,所以林伯特用番同樣陣式應對,不過無論點都好,結果論黎講總算係一場大勝。

出場陣容方面,安排魯迪加、基斯甸臣以及湯姆利組成三人防線,而佐真奴同高華錫作雙中場,前面左中右分別係蒙治、艾巴咸以及韋利安,而左右翼衛就係馬高斯阿朗素同艾斯派古達,開波初段其實雙方都無乜機會猜到入對方禁區,直至湯姆利射入果球世界波之後,狼隊就好似回唔到神咁,轉眼間就比人入左三球,湯姆利哩球世界波可以話神來之筆,可能你叫佢射多次比你睇都未必得,而及後佢亦單人匹馬殺上前場製造入球,連續兩場打正選既佢今場喺進攻端既表現可以話令人眼前一亮。

不過其實湯姆利喺防守上既失誤都有唔少,只係今場波喺進攻上既貢獻掩蓋過左個人防守既失誤,今場波既兩球失波查實都係關佢事,先係角球頂空比對手前插頂入,之後第二球就係跟漏人令球隊失波,其實仲有一球係佢喺近中場位置被撞跌後對手殺入禁區要阿朗素補位,而及後後者更喺禁區接跌對手,好在球証無判十二碼,否則三球失波直接同間接都需要湯姆利負責。

至於後防兩位拍檔基斯甸臣同蘇馬兩者喺三中堅既體系下表現就相對穩定,至少睇到比去過去幾場所犯既個人失誤都比較少,而中場方面雖然簡迪仍然因傷未有上陣,不過佐真奴同高華錫哩個組合既發揮亦相當理想得宜, 前者負責派牌策動攻勢,後者負責持球推動接應,而佐真奴亦獲得自加盟車路士以為第一個助攻,如果之後唔係蒙治射中網側的話哩位意大利中場就會交出雙助攻既成績。

而前線方面,艾巴咸同蒙治既表現十分搶眼,唔少球迷話韋利安簡直係進攻黑洞,但其實巴西人喺哩場今季第一次作正選黎講表現唔算太差,好多時喺右邊路既推動同回防都係靠佢幫助,雖然上腳時間多,不過佢好肯持球左右兩邊走,咁樣係會令對手較難作出人釘人既佈防,而全隊喺翼鋒暫時只係得佢同柏度會較多時肯咁樣做。

同樣地今季首場正選既阿朗素都不過不失,上左去返唔到黎其實都唔係今場波先發生,不過最重要既其實係有人補到左邊哩個位,睇到佐真奴同高華錫都好肯去做哩項工作,所以問題暫時不大。至於後備球員方面想講一講巴舒亞伊,哩位比利時前鋒好有煥然一新既感覺,如果唔係門前欠運的話今場波都經已取得入球,好幾下捕位都捕得幾準,亦都少左喺季前熱身賽出現喺前場既笨手笨腳畫面。
總結 無論用咩陣式都好,林伯特喺戰術上既主要內容都依靠邊路作推進,以小組快速傳球形式製造空間比邊路球跑上前場,而喺三中堅既體系下會比起前幾場既陣式更著重於控球同控制節奏方面,換句話說係減少左球員喺體能付出方面既消耗,亦因為咁今場波後半段都見到球員仲有氣有力跑到上前場,無左之前個個透大氣既畫面。開季至今林伯特分別選用過4231、433以及343陣式,亦係過往好幾季車路士球員所用開既陣式黎,林伯特未有執著於自己較偏好既4231而選用其他陣式對球隊黎講絕對係好事,下一步就係務求將攻同守方面取得平衡,至少都希望幫助基柏保住一場清白之身吧。


文章發表時間 : 15/09/2019 12:30
文章最後更新時間 : 15/09/2019 12:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  林伯特  狼隊  艾巴咸  

留言


請按此登錄後留言。未成為會員? 立即註冊
    快捷鍵:←
    快捷鍵:→