《一季過客 歐冠功臣 紋身型男 - 美利拉斯》

藍獅 於 08/04/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


美利拉斯,一聽到哩個名相信唔少人會即刻諗起拉美利斯,名字上的確較容易令人混淆,不過兩者喺類型上都係截然不同風格既中場球員,而美利拉斯身上既紋身定必成為辨別兩者之間最好既記認,可惜既係球員只短暫加盟一季就沖沖離開,不過佢哩一季過得總算令人相當刻骨銘心。

2011年夏天由利物浦轉投到車路士既佢,係繼費蘭度托利斯以及班拿約後第三位由晏菲路轉到史丹福橋既球員,似乎當時藍軍對於能夠攻破己方大門既紅軍球員特別情有獨鍾。喺當時艾辛長期受到傷患所困擾底下,車路士喺中場中既人手配置可以話非常有限,只有林伯特、拉美利斯、米基爾三位常用主力以及一班年青小將,無論喺戰術上還是輪換上都的確有需要增添多一名中場球員,不過美利拉斯並非當時車路士既第一目標。

車路士將哩個位置既首選定為啱啱擊敗C朗、美斯既「金球奬」得主,當時仲效力緊熱刺既莫迪歷身上,藍軍不斷為克羅地亞人加碼報價,但一律都被熱刺拒絕,由於時間緊迫,車路士不得不另尋目標。亦好快就傳出美利拉斯哩個名,而球員喺轉會後指出當時收到報價後其實並不希望離開紅軍,似乎利物浦既決定成為左哩單轉會既關鍵。

喺踢法方面,美利拉斯可以話係一個相當全面既中場球員,無論攻守方面表現都非常稱職,而且能夠擔任中場上每個位置,主要取決於教練戰術既部署安排,加上球員遠射準繩度亦相當高水準,只要皮球落喺站於接近禁區線外既佢腳下,幾乎每次起腳都能夠命中目標。自佢同林伯特離開之後其實都無乜邊個球員能夠喺遠射方面接棒,實在令人懷念。

球員同當時車路士新上任既主教練韋拿斯保亞斯曾經喺波圖短暫合作,雙方互相都有一定認識,亦令佢好快成為藍軍中場既絕對主力,不過經過一輪動盪後,保亞斯黯然落台由迪馬堤奧走馬上任,美利拉斯亦成為左輪換球員。而喺歐聯準決賽被判罰一面黃牌,導致佢不能夠喺安聯球場既決賽上陣,可以話非常可惜,不過最終美利拉斯都能夠為球隊贏得歐冠以及足總盃兩座奬盃,絕對係寫下歷史。

車路士成為歐聯冠軍後,球會方針亦都改變了,同時吸引唔少年輕有名既球員加盟,在於換血係大勢所趨,最終美利拉斯經歷短短一季後亦選擇離開,實在可惜,不過都經已讓球迷們刻骨銘心。


文章最後更新時間 : 8/4/2019 16:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→