《深入淺出》 干地絕不應該孤注一擲在邦路斯身上

BluexLion車迷手記 於 07/06/2017 發表 收藏文章
-請支持藍獅 Facebook專頁-
<歡迎轉載 請列明出處 謝謝>

據媒體《ESPN》所報導,車路士已向祖雲達斯報價收購旗下後防BBC其中一員邦路斯,藍軍曾在上季干地上任後追逐過哩位意大利鐵衛,但老婦人並未有願意放行,最終只能從巴黎聖日門收購舊將大衛雷斯作補充,而言泰利已在季後離開球隊,似乎干地亦對自己既舊部邦路斯念念不忘。假設哩單交易最終能實現,對車路士是好是壞?本文為大家細心分析。
.圖片來源 : Evening Standard

先了解究竟點解干地需要邦路斯,就要從球員既特質講起,意大利人係一名用波型中堅(ball-playing centre backs),就係利用佢成為進攻既第一點,將個波有效地運用,負責控制、協調中後場傳送及直接將皮球透過長傳快速送到前線作攻勢。哩類型既中堅喺現今既足球體系特別吃香,而曼城領隊哥迪奧拿亦特別鍾情哩種中堅,上季都有同車路士想從老婦人手上搶走邦路斯,最終失敗後藍月亮選擇高價向愛華頓收購擁有同樣潛力既史東斯,可惜今季表現未如理想。而邦路斯喺干地仲執教緊祖雲達斯或意大利國家隊時期入面,主要係以與基亞連尼、巴沙利合組三後衛最為殺食,而球員主要擔當左後衛,在車路士同樣被干地轉變成三後衛體系當中的確有佢既生存空間喺度。
.圖片來源 : The Telegraph

今季車路士既343陣式雖然為英超新手干地帶黎第一個聯賽冠軍,但有睇開既球迷都唔難發現哩個三後衛陣式並非無堅不摧,主要原因係三位球員各自都有缺點暴露左出黎。先講艾斯派古達,今季好幾次被對手在藍軍既右路上進行高空轟炸,而西班牙人正正係事件既受害者,即使幾咁盡力迎頂高波,本身存在既身高所限亦導致佢力不從心,絕對有怪不怪;卡希爾同大衛雷斯主要就係轉身同速度慢,後者在季尾亦回復左唔少「炸彈」本色,但佢同樣地擁有用波既技能,而前者如無意外來季會戴上泰利留下既隊長臂章,喺剛剛足總盃決賽雖然敗陣但表現絕對展示出有力繼承鐵血精神。
.圖片來源 : Eurosport

反觀如果邦路斯黎到藍橋,經驗會係帶比車路士後防最好既一環,邦路斯用波能力與大衛雷斯相近,兩者都擁有作出精準長傳到前線既能力,而前者不時會見到佢利用一啲小技術去戲弄對手同時繼續保持球隊控球權,並非班門弄斧,表現亦相對巴西人較為穩定,至於制空力同卡希爾不相伯仲,不論角球攻門還是高空防守都能夠喺合適既位置迎頂高波,同時擁有不俗既攔截能力、身體質素同位置感。在過往意大利國家隊又或者代表祖雲達斯征戰歐洲大賽表現亦令人信服,絕對係現今球壇其中一名世界級中堅。

但有利自然有弊,意大利人與卡希爾同大衛雷斯兩者擁有相同既缺點,都係存在速度問題,同時佢喺意甲既犯規次數比超車路士既三名中堅還要多,而且邦路斯已經三十出頭並自出道以黎未嘗離開過意大利聯賽,能否負荷以及適應相對較快同體力化既英超的確存在未知知數。而言來季基斯甸臣回歸藍橋,蘇馬好大機會外借到其它球會鍛鍊,在未有其它主力後防球員離開既前題底下,補充一名像邦路斯咁既世界級後衛無疑係握殺左年輕球員接班既機會,對車路士按步就班讓各梯隊球員上位呈現出一個不良現象。
.圖片來源 : City Watch

祖雲達斯過去幾季一直選用基亞連尼、巴沙利以及邦路斯三人作核心,而後者亦係三人之中最年輕既一位,相信老婦人並唔會用一個合理既價錢去放走哩位當家球星,雖則邦路斯係遇上干地哩位伯樂後至達到今時今日既成就,但與其用一個破記錄既價錢去收購一名年過三十既後衛,又何解干地唔調教大衛雷斯成為佢手中既下一位邦路斯呢?

.圖片來源 : Eurosport

干地 絕不應該孤注一擲在邦路斯身上...

來源 : http://www.espnfc.com/blog/transfer-talk/79/post/3139402/chelsea-joining-race-to-sign-juventus-defender-leonardo-bonucci

<歡迎轉載 請列明出處 謝謝>
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 干地  車路士  邦路斯  祖雲達斯  

留言


請按此登錄後留言。未成為會員? 立即註冊
  • 閒雲野鶴 於 07/06/2017 評論 NO. 1

    最主要原因係車仔大把錢又捨得花,人哋賣唔賣係另一回事,總之啱用就報價。

  • OhMyGirl_Arin 於 07/06/2017 評論 NO. 2

    邦路斯好過雷斯好多啦 今季雷斯雖然進步好多 但都仲係經常自爆 簽到佢好過簽雲迪克

  • WK Kenky Chan 於 07/06/2017 評論 NO. 3

    車仔有好多好潛質既中堅都唔用卡希爾都30以上,都要有預備新人接位

  • OhMyGirl_Arin 於 08/06/2017 評論 NO. 4

    邦路斯好用過t silva啦 而且又係干地愛將

  • kinfung 於 08/06/2017 評論 NO. 5

    會吾會離開祖記呀on99,人地祖記今年又入歐聯決賽呀,車迷又打曬飛機

  • OhMyGirl_Arin 於 09/06/2017 評論 NO. 6

    打飛機得過猁迷j雲迪克j到出臨門一腳射唔出

快捷鍵:←
快捷鍵:→