足總杯決賽賽後感:仲衰過黑哨既盲哨

Blu波pen 於 02/08/2020 發表 收藏文章
球證呀,不如你唔好叫球證,你叫球盲算啦。

唔講晦氣說話住,首先恭喜阿仙奴同阿迪達,我覺得今場阿仙奴贏波係well-deserved既。兩隊不論係排陣、戰術同整體實力都好接近,但阿迪達既戰術部署明顯更具針對性。例如係知道Azp同James會壓到好前,就故意用奧巴黎打身後,咁呢招係非常之work既。首先製造左個十二碼,另外仲搞到Azp追奧巴追到老抽。其次其實仲有唔少戰術細節,好似係今場阿仙奴不論係角球同傳中都好刻意斬去尾柱。有睇開車仔都知陣中既中堅算係ok頂得,但就成日睇漏人失尾柱波。阿仙奴三箭頭都唔算係擅頂,用呢招係成功製造到唔少威脅。加上今場阿仙奴既狀態同決心都更強,即使早早輸一比零都冇亂陣腳,仲能夠持續做到唔少入肉既攻勢。而車路士就明顯冇咁fit,好多五五都搶唔贏,仲要連傷兩件(仲未計尾段既柏度)。失去兩個陣中大將既車路士可以話非常不幸,同時亦打亂晒林柏特既game plan。係而家五個換人名額既措施下,球隊只有三次換人機會,而車路士兩次因傷換人,即係已經用左兩個機會,如果林柏特仲想換人就只可以一次過換埋其餘三個名額,咁樣亦令到林柏特唔敢貿然換人。種種因素下,阿迪達將呢場五五波變成六四開,最終贏得上任後首個獎杯,可謂實至名歸。
君子既說話就講完,我諗大部份既車迷都有種咁既感覺:「輸唔係問題,但係咪要咁樣輸呢?」老實講我見到佩利錫傷出既個刻已經feel到場波會輸,而事實上阿仙奴亦係表現更佳既一隊。但球證呀球證,點解你要將場波搞成咁呢?到底一場波中出現左幾多次有問題既判決呢?高華錫第一張牌已經頗具爭議性,不過我當去勢太急睇唔到,而且個下落腳都似係黃牌level既foul,呢張牌都算成立。但第二張完全係錯判,球證舉牌個下我甚至以為係吹返阿仙奴轉頭。仲有奧巴入第二球前比爾連對基斯甸臣既落腳又係無視左。然後馬天尼斯疑似禁區外接波亦係冇好好交代到,如果可以停落黎睇完VAR澄清係no foul咁成個觀感都會好好多。最後臨完場前比比一野騎上柏度上面又係冇foul。成場波唯一吹得正確既big call就係球十二碼,其餘所有既wrong call都係直接影響左場比賽。

好多人話係黑哨,我係唔同意既。黑哨起碼都明白個intention,但而場Anthony Taylor明顯係控唔住場亂咁吹。好似去到87分鐘既時候,雷斯已經行到去場邊準備換Papa,但Anthony Taylor竟然睇唔到冇吹停到,搞到雷斯都唔知應該點。種種跡象都顯示呢堆英超球證(連埋坐VAR個班)根本唔夠料去執法高水平既比賽,成場比賽既管理都做得好差。呢種亂9咁吹既情況唔止影響球賽觀賞價值,更令勝出一方既球迷蒙羞。當然你可以話阿仙奴球迷係「獎杯己袋,理L得你」,但我相信佢地都想好好既去享受阿迪達上任後首個獎杯。而家就莫名其妙地蒙上「黑哨」既污名,連想慶祝都好似冇咁理直氣壯。
已經唔知係今季第幾次係賽後將焦點放係球證仲多過場波本身,冇人想場場輸波瀨球證,但事情真係不停地發生,隨便數都已經可以數到一堆錯判既例子。明明已經引入左VAR呢種高科技去幫助執法,點解情況可以越來越差?球例不停去修改,但無論點都係做唔到公平公正。咁到底係VAR同球例既問題,定係執行者既問題?點解其他聯賽既情況會好咁多?英超經常對外宣傳自己係「競爭最激烈既聯賽」或者係「最具娛樂性既聯賽」,而事實上英超確實係全球最多觀眾既比賽,但而家就連最基本舉行一場公平既比賽都做唔到。到底球迷仲要忍受幾耐呢d低水平既執法?再係咁落去,我諗未來見到英超球證拖住隻導盲犬上場吹雞我都唔會覺得驚訝。

如果你中意呢篇文,希望你可以like埋我個facebook page,多謝各位大佬!
Blu波pen:
https://www.facebook.com/blueballpenhk/
標籤: 車路士  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→