愛華頓對車路士:技術性擊倒

Blu波pen 於 13/12/2020 發表 收藏文章
敗走葛迪遜公園大概係每季嘅必然,車路士喺聯賽再次輸比默西塞特郡球隊,連續多場不敗走勢告終。今場可以話係開季以來表現最差嘅比賽,如果話對西布朗係個人失誤、對修咸頓係粗心大意,今場就係徹底被技術性擊倒。

愛華頓嘅進攻核心占士洛迪古斯同正選左右閘迪尼、高文缺席,安察洛堤冇派上後備二閘,反而用葛菲同賀基特兩位中堅客串左右閘,擺明車馬打穩守突撃,而呢個四中堅陣式亦成功瓦解車路士嘅進攻。

今季車路士進攻時兩個翼鋒會內收到half space位置,吸引對方注意並製造空間比二閘後上。占士同捷維爾嘅強項在於跑動,能夠睇準對方防守空隙適時前插,而呢套利用二閘帶動進攻嘅套路亦成為車路士嘅主要進攻方式。

不過呢個進攻套路係今場就遇到好大困難,葛菲同賀基特專注邊路防守甚少助攻,再加上李察利臣同伊禾比兩位翼鋒嘅積極回防,車路士喺邊路得到嘅空間非常有限,每次占士同捷維爾拎波都會一至兩位愛華頓球員看守,令佢地好難作出具質素嘅傳中。車路士全場32次傳中僅得4次成功,當中唔少喺第一點已經被擋出。
邊路防守穩健,愛華頓中場唔需要作出太多防守橫移,能夠專心負責中路防守。杜哥尼同阿倫鎮守喺兩個half space,加上施格臣嘅適時協防,愛華頓中場防守穩定,三人合共交出7次搶斷、10次攔截,車路士同樣難以從中路進攻。

車路士控球率達到72%,但就只得10次射門。全場xG只有1.01,當中有0.52來自蘇馬嘅門前近射,其餘起腳機會嘅xG都唔高過0.1。愛華頓今仗嘅防守成功好大程度源自於人數看管上,愛華頓嘅451對上車路士嘅433時能夠確保每個敵方球員都有至少一名己方球員看管(所以當蘇馬同施華突然從後場持球推進殺入三閘線內時其實為愛華頓防守製造到小混亂,只可惜都係無功而還)。喺面對嚴密防守下,車路士欠缺可以直接擺脫防守球員嘅突破點,亦冇能夠撕破防線嘅創造點。冇錯,就係冇咗佩利錫同薛耶治。今場踢左右翼嘅雲拿同夏弗斯唔能夠取代呢兩位球員嘅作用,前者速度飛快但不擅於小空間爆破,後者嘅創造能力仍然有待磨練。唔敢講兩人有上場車路士就能夠入波,但至少佢地能夠增加車路士嘅進攻手段。
愛華頓嘅保守可能係意料之外,但林柏特嘅即時對應亦做得唔好。久攻不下後林柏特喺下半場決定以艾巴咸入替夏弗斯,把心一橫打燒味戰術。可惜呢個改動並無帶來正面效果,車路士喺下半場嘅xG僅得0.19,發揮比上半場更差。上半場車路士雖然無法喺邊路嘗到甜頭,但夏弗斯喺half space嘅走動能夠分薄愛華頓邊路防守人員,或多或少都為占士製造前插空間。但當艾巴咸入替後占士變得更孤立無援,根本連起腳斬波嘅空間都冇。

今場已經唔係車路士第一次出現想發動總攻反倒令進攻癱瘓嘅情況,欠缺完善plan B下只好將希望放到燒味上,但盲目傳中嘅成效真係好低。此外,上半場已證明今場難以攻下愛華頓嘅邊路,但全場仍然有近半嘅進攻組織係來自右路。上季林柏特非常願意喺比賽途中改變策略,但今季就出現唔少不必要嘅固執,呢點令人頗為費解。

防守方面,今場已經係文迪連續第二場出現致命性失誤。文迪嘅撲救能力值得信賴,但其出迎表現就使人擔憂。踢高位防線嘅球隊需要一個可以擔當清道夫嘅門將,而照現時表現嚟睇文迪未能勝任呢個角色。再宏觀一啲嚟睇呢個「法語幫防線」,文迪出迎表現不穩、施華跑速慢、簡迪易失位、蘇馬單防能力不足,令我再次思考車路士係咪真係適合踢高位防守。當然要主攻就難免要將防線推前,但如果球員特質不符合時就要諗諗如何用戰術掩蓋弱點。
最後要講講夏弗斯。由加盟開始坊間已經不斷討論應該將佢放到咩位置上,但而家更明顯嘅問題係佢仍然未適應到英超嘅節奏同強度,所以不論將佢放到咩位置上都會格格不入。今場見到夏弗斯好幾次因為傳送球速不足而傳失嘅情況,而且佢做決定時亦需要過多時間。或者喺德甲時呢個速率係可行,但嚟到英超就係另一個故事。早前嘅表現其實已經漸入佳境,但中完肺炎後好似又要從零開始再適應過。當然今季只係夏弗斯登陸英超嘅第一季,而佢亦只係一個21歲嘅年青球員,由此定斷成敗仍然係非常言之尚早。

雖然落敗而回,但非常失望其實又稱唔上。前幾場嘅勝仗中已經見到球隊嘅缺陷,只不過對手都唔能夠加以利用。希望林柏特有從恩師身上再上一課,以更好嘅姿態迎接聖誕快車期。

如果你中意呢篇文,希望你可以like埋我個facebook page,多謝各位大佬!
Blu波pen

如果喜歡我們的文章,請即分享到︰

標籤: 車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→