今季英超焦點是各隊如何以破紀錄轉會費買人，但有一批球員卻以平靚正獲得青睞，尤其是在「平」這一點做得最徹底，轉會完全免費，零機價上台。當然日後有人工和其他開支，但慳咗「首期」已經好抵。即使球會有米，亦要符合歐洲足協財政公平條例，這類球員真是在球場內外都幫到手。
不要以為免費唔方好嘢，本欄精選今季英超免費簽約最佳11人陣容，當中不但有前皇馬和巴塞球員，而且大部份都是現役國腳，難怪不但吸引到一群中下游球會埋黎睇埋黎揀，連曼聯、利物浦、李斯特城這些大客，都有份唔駛錢執筍嘢！
唔信即刻排個5-3-2過你睇....
門將 :
古辛 Brad Guzan (米杜士堡)
美國國家隊正選門將，曾獲國際賽及美職聯金手套獎，於阿士東維拉有豐富英超經驗。
門將位置除了古辛外，還有與他同隊的域陀華迪斯和利物浦的曼寧加，同樣都是「零價一切」。
後防 :
馬里亞柏 Adrian Mariappa (屈福特)
在水晶宮算是鬱鬱不得志，加入愛回家卡士，重返曾效力逾七季的屈福特。雖然偶有甩漏，但勝在可擔任閘衛或中堅，而且速度唔差，因為，話哂都係牙買加國腳。
祖爾馬迪普 Joel Matip (利物浦)
唔好以為免費一定隨街有得執，這件身高1米95、頭球能力甚強的喀麥隆國腳，紅軍一早就要預訂，雖然只得25歲，但已為史浩克零四上陣超過250場，高普又點會唔識佢？
般拿度 Bernardo Espinosa (米杜士堡) 27歲，西維爾青訓產品，曾入選哥倫比亞國家隊，但未有上陣。般拿度在前季是希杭重返西甲的主力功臣，獲選當季西乙最佳後防球員，免費有得簽，西甲兵專家卡蘭卡點會放過。
路爾斯靴南迪斯 Luis Hernandez (李斯特城)
27歲，名廠出品，曾效力皇馬青年隊、C隊和B隊，過去數季都與樓上的般拿度在希杭拍檔。李城簽入的低知名度球員可以好可怕，而家零鎊，出年隨時唔知幾多m！
艾比路亞 Alvaro Arbeloa (韋斯咸)
同樣皇馬出品，這件就更是過去七季都在一隊效力的「落場版」，擁有兩屆歐國盃和一屆世界盃冠軍獎牌。上面提及的馬迪普，見到大髀露罅都要叫聲師兄，這名33歲的前西班牙國腳，在紅軍兩季有66場英超出賽經驗。
中場 :
洛特維迪 Havard Nordtveit (韋斯咸)
26歲，防守中場，挪威國腳，被雲加在2007年由挪超侯格辛特簽入，成為阿仙奴青年隊隊長，當時曾被寄予厚望，但在兵工廠三年，主要都是在外借和預備組中度過，過去五季效力慕遜加柏。有兩場英超經驗，不過是今季在韋斯咸獲得。
派拿 Steven Pienaar (新特蘭)
34歲，前南非國家隊隊長，曾效力阿積士、多蒙特、愛華頓和熱刺。今次已是莫耶斯第三次簽下這名愛將，個人技術不俗，但近年都是傷多過踢。
菲候利 Sofiane Feghouli (韋斯咸)
26歲，法國出生，阿爾及利亞國腳，2012年阿爾及利亞雙料足球先生。過去六年效力華倫西亞，在西甲早已打響名堂，看家本領是邊路突破，帶波過人。
前鋒 :
笠臣簡奴 Hal Robson-Kanu (西布朗)
今屆歐國盃威爾斯除了巴爾、藍斯，還有27歲的笠臣簡奴，最出位莫過於以「告魯夫轉身」入球助球隊殺入四強，過去在雷丁有過一季英超經驗。與簡奴同樣司職前鋒的笠臣簡奴，日前加盟了笠臣出身的球會西布朗。
伊巴謙莫域 Zlatan Ibrahimovic (曼聯)
34歲，十屆瑞典足球先生，足跡踏遍歐洲六國聯賽，球會級賽事奪標無數，有「球壇呂布」、「瑞典神塔」之稱。上季以38球再度成為法甲首席射手，轉投紅魔後表現繼續保持強勢，四場入四球。
轉會費數字:skysports
請按此登錄後留言。未成為會員? 立即註冊